Jamita Minggu 7 Nopember 2010

RADOTI MA PATIK NI DEBATA 

 

5 Musa 4 : 1-10

4:1 Nuaeng pe, ale Israel, sai tangihon ma aturan dohot uhum, angka na hupodahon tu hamu, sibahenonmuna, asa mangolu hamu jala masuk hamu tu tano siteanonmuna i, na nilehon ni Jahowa, Debata ni ompumuna i tu hamu.

4:2 Ndang jadi ambaanmuna tu hata naung hutonahon i tu hamu, jala ndang jadi oruanmuna sian i, ingkon radotanmuna do angka tona ni Jahowa Debatamuna i, naung hutonahon i tu hamu.

4:3 Nunga matamuna sandiri marnida, na binahen ni Jahowa tu Baal-Peor, ai manang ise na mangihuthon tu Baal-Peor, nunga direndephon Jahowa, Debatamu, ibana sian tongatongamu.

4:4 Alai anggo hamu, angka na marsihohot tu Jahowa, Debatamuna i, mangolu do saluhutna sadarion.

4:5 Ida ma, nunga hupodahon tu hamu angka aturan dohot uhum, songon na tinonahon ni Jahowa, Debatangku tu ahu, asa bahenonmuna songon i di tano simasukanmuna i bahen partalianmuna.

4:6 Antong radoti jala ulahon hamu ma angka i, ai i do gabe hapistaranmuna dohot hapantasonmuna di adopan ni angka bangso; ia dung dibege nasida saluhut angka aturan on, gabe dohononnasida ma: Bangso na pistar sahali jala na pantas marroha do bangso na bolon on!

4:7 Ai tung tu bangso na bolon dia ma songon i jonok angka Debata, songon Jahowa, Debatanta i, manang piga hali pe hita pajoujou Ibana?

4:8 Ai tung di bangso na bolon dia ma adong aturan dohot uhum na tigor, songon sandok patikon, na hulehon di adopanmuna sadarion?

4:9 Antong ramoti ma dirim jala parhamaol situtu tondim, asa unang lupa roham di jamita, angka naung niida ni matam, asa unang tallus sian roham saleleng ho mangolu, jala ingkon pabotohononmu do angka i tu angka anakmu dohot tu angka pahompum.

4:10 Di ari uju na jongjong ho di adopan ni Jahowa, Debatam, di Horeb, uju na nidok ni Jahowa tu ho: Paluhut ma bangso i di Ahu, asa Ahu patubegehon tu nasida hatangku, angka siparateatehononnasida, asa marhabiaran nasida mida Ahu saleleng mangolu nasida di tano on, asa diajarhon huhut tu angka anakkonnasida.

Patujolo

Buku 5 Musa on  ima  buku na palimahon sian “lima buku ni si Musa” (Pentateukh). Buku Musa na parjolo  ima Genesis/Kejadian, paduahon ima Exodus/Keluaran, patoluhon ima Leuitikon/Imamat, paopathon ima Arithmoi/Bilangan,  jala na palimahon Digoari Deuteronomion/Ulangan.

Buku 5 Musa on ima angka jamita ni si Musa di jolo ni bangso Isarel di tingki nasida sahat di Luat ni Moab. Maradi do nasida disi dung marujung pardalanan na mansai ganjang di parhorsihan lao masuk tu Tano Kanaan nanaeng inganan nasida.

Digoari do Buku 5 Musa on “Kitab Ulangan”  manang “ patik na di paduahali”, ala marhite buku 5 Musa on di paingot muse nasida taringot angka patik naung jinalo nasida (di rata-rata i). Buku on patuduhon “dapotan pasu-pasu ma na marsihohot di Debata” alai “dapotan uhum ma na manimbil sian patik ni Debata”.

Hatorangan

Tung mansai godang dibahen si Musa penjabaran manang aplikasi ni Patik na-sampulu i. Adong do lobi hurang 600 “patik” na gabe songon Konstitusi ni halak Yahudi, ima taringot tu angka na boi dohot na so boi silulaon ni halak Israel. Adong mai patik taringot tu angka Pelean situtungon, undung-undung parluhutan, Sipanganon, Ari pardamean, patik taringot tu parsaoran, dna.

Angka i do na dipaingot si Musa di turpuk  5 Musa 4 on, dipaingot si Musa do bangso I asa tongtong mangaradoti patik i. Ndang jadi ditambai manang di orui, alai hot ma di patik i, unang dihalupahon angak jamita I, alai ingkon dipabotohon do I tu angka sundut n umposo asa diboto nasida.

Si Musa paingothon asa adong pesan berantai sian generasi tu generasi, unang gabe terputus barita i. alani do didok di 5 Musa 6 : Jala ingkon parateatehononmu luhut hata on, angka na hutonahon tu ho sadarion. Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse. Jala ingkon rahuthononmu angka i bahen partinandaan di atas tanganmu, jala bahen parningotan di holangholang ni matam. Jala ingkon surathononmu angka i tu tohang ni jabum dohot tu panggumbanganmu.

Aplikasi

Di ngolunta sinuaeng on, nunga jotjot natoras lupa pabotohon tu angka ianakkon angka tona ni ompu si jolo-jolo tubu, apalagi ma pabotohon hata ni Debata. Gabe dang “bersambung” angka tona I tu generasi na umposo. Di ujungna olo ma gabe adong “missing link” antara generasi tu generasi. Mansai jorbut do I molo gabe mago identitas ni dakdanak (tarlumobi identitas hakristenon). Alani porlu sahali do hita angka natoras mangalehon tingki laho manghatai-hatai dohot angka ianakkon manaringoti angka pardalanan ni ngolunta, na tontu sahali sai adong do disi tahilala solot “campur tangan” ni Debata. Pengalaman-pengalaman rohani na ta alami, ido boi gabe sada tona tu angka ianakkon asa lam diantusi nasida eksistensi ni Debata di parngoluonta.

Songon panutup adong 3 na tai da sian turpok on, ima :

-          Taradoti ma patik ni Debata marhite na marsihohot mangulahonsa

-          Unang ma taorui manang tan tambai angka patik hombar tu kepentingantabe

-          Pabotohon ma angka denggan basa dohot pasu-pasu ni jahowa naung tajalo I tu angka sundut na umposo.

Antong tapangke ma tingki dohot sarana na adong di hita, manang sadihari pe laho manaringoti hata ni Debata. Amen