RENUNGAN JUBILEUM 150 TAON HKBP

QUO VADIS HKBP ? (LAHO TU DIA DO HKBP)

Nunga 150 taon HKBP dibagasan taon 2011 on, mardomu tusi nunga dipatupa ragam ni angka ulaon dohot pesta laho manghalashon ari hatutubu ni Huria na Bolon i. Mamungka sian bulan Oktober 2011 on dipatupa do angka pesta parolop-olopon di piga-piga inganan, di huria marsada-sada, di resort, di distrik sahat tu tingkat wilayah, jala na parpudi di tingkat nasional ima di Jakarta tanggal 04 Desember 2011 na naeng ro. Marolop-olop do sude ruas ni HKBP mangihuthon angka ulaon i, ndang holan ruas, angka uluan ni HKBP pe dohot do marolop-olop, ai marhite angka pesta i, tarida ma habalgaon ni HKBP.

Alai hea do hita (uluan dohot ruas ni HKBP) mamingkiri songon dia ma rumang ni HKBP 50 taon na naeng ro? Atik naung lalap do hita di euphoria Jubileum 150 taon HKBP on, gabe ndang sanga hita mangaranap tu jolo, laho tudia do HKBP tu ari na mangihut.    
Soara ni sub tema Jubileum 150 taon HKBP na mandok  : “Dengan Jubileum 150 tahun HKBP membangun jati dirinya sebagai gereja yang bersumber kepada Alkitab, beribadah dan mencerdaskan seluruh warganya, bersaksi dan melayani di tengah-tengah masyarakat,
serta mandiri di bidang teologia, daya dan dana”, tung mansai uli do nian begeon, alai laos tusi tudu-tudu ni sungkun-sungkun on. 

“Jati diri”, molo di hata batak boi ma ra astuan ni i sarupa dohot “hadirion”.  Molo di Kamus Besar Bahasa Indonesia didok ma i :  (1) ciri-ciri, gambaran, atau keadaan khusus seseorang atau suatu benda; identitas; (2) inti, jiwa, semangat, dan daya gerak dari dalam; spiritualitas.[1] 

Sada sian “jati diri” ni HKBP ima hata “Batak” na adong di Huria Kristen Batak Protestan (HKBP). Dibagasan hata “Batak” i, dihorhon i do sada jati diri ni HKBP na “marhata Batak”, i ma na gabe ciri, gambaran, atau keadaan khusus atau identitas HKBP, jala laos i do gabe inti, jiwa, semangat, dan daya gerak dari dalam dibagasan  spiritualitas ni HKBP.

Mulak tu sungkun-sungkun nangkin, laho tudia ma HKBP na “marhata Batak” i, lima pulu taon na naeng ro? Boasa adong sungkun-sungkun on?

Molo taida nuaeng angka ianakkon ni halak Batak na di pangarantoan dohot na di bona pasogit, tarlumobi ma na tubu di taon 2000-an, ra ndang piga be na boi “marhata Batak”,  jala molo dibahen statistic, boi dohonon 99 % dakdanak na tubu di pangarantoan, ndang diantusi be “hata Batak”, dohot 90 % dakdanak na di bona pasogit nuaeng on, nunga be mar hata Indonesia di bagas na be.

Alani, boi dohonon ndang piga be generasi na di ginjang ni taon 2000 boi mar hata Batak di Bona pasogit, tarlumobi ma na di pangarantoan. Hape, 50 taon na naeng ro, angka generasi 2000-an on nama na gabe ruas dohot uluan ni HKBP.

Antong, boha na ma i, tudia ma boanon nasida HKBP on 50 taon na mangihut? Manang na gabe sesaon nasida nama hata “Batak” i sian HKBP?. Jahaon na dope Bibel na marhata batak ? Tarbege dope angka ende na uli na sian Buku Ende HKBP i? Adong dope Agenda na marhata batak? 

On ma na ingkon sipahusor-husoronta, tarlumobi angka natoras, molo masihol do hita asa hot HKBP na Bolon di “hadirion” (jati diri) na, sahat tu angka sundut na mangihut, ingkon tapungka ma :

• Manghasomalhon “marhata Batak” di bagas ta be tu angka ianakkonta
• Tu angka natoras na di Bona pasogit, unang ma laos gabe hita na mangonjar angka ianakonta i manadingkon hata Batak holan alani na laho mangihuthon hamajuon dohot gaya hidup na modern.
• Tu angka uluan ni HKBP, ingkon di pingkiri ma laho paradehon parsikkolaan (kursus) hata Batak tu angka ianakkon tarlumobi tu angka dakdanak Sikola Minggu. 
• Huhut ma hita dibagasan tangiang, asa anggiat tongtong HKBP di ojahan na hot i, ima Kristus Jesus Tuhanta i, jala laos dohot ma hita tongtong hot di hadirionta i songon “bangso Batak” naung pinalua sian haholomon, bongot tu hatiuron.

HORAS ! SELAMAT MAR JUBILEUM 150 TAON HKBP ![2]

---

[1] kbbi3

[2] Hombar tu statistic ni HKBP, sahat tu Januari 2011, torop ni ruas HKBP godangna lobi hurang 4.100.000 halak, ima na marhuria di 26 distrik, 614 ressort, dohot 3.226 huria. HKBP dihobasi 2.590 parhalado partohonan na gok tingki, ima 1.470 pandita, 428 guru huria, 408 bibelvrouw, dohot 284 diakones, ndang dietong dope i dohot angka Sintua.