Selamat datang di blog sederhana ini, kiranya menjadi berkat bagi kita semua

Senin, 17 Oktober 2011

JAMITA MINGGU 23 OKT 2011

HOLONG NI ROHA NI AMA I
Ev.  Lukas 15:11-24
15:11 Jala ninna ma muse: Adong ma dua anak ni na sahalak.
15:12 Gabe didok sianggian i ma mandok amana: Amang, lehon tu ahu sinamot, manang sadia tohaphi! Jala disagihon ma tu nasida panamotan i.
15:13 Ndang pola piga dan nari, dipapungu sianggian i ma saluhutna, dung i laho ma tu luat na dao; disi ma dipansuasaehon sinamotna paolooloi hisapna.
15:14 Dung dipasuda saluhutna i, masa ma haleon potir di na saluat i, jadi dohot ma ibana mamungka rapar.
15:15 Jadi laho ma ibana mahiandu tu sada halak pangisi ni luat i, gabe disuru ma ibana tu ladangna, marmahan angka babina.
15:16 Disangkapi rohana do manggohi butuhana langkat i, indahan ni babi i; alai ndang adong na mangalehonsa tu ibana.
15:17 Dung i dipasuang ma rohana tu bagasan, ninna ma: Torop ni halak digaji damang, angka na lobian di indahan; anggo ahu mate ma anturaparon dison!
15:18 Hehe nama ahu laho mandapothon damang; dohononku ma tu ibana: Ale amang, na mardosa do ahu tu banua ginjang nang dompak ho!
15:19 Ndang tama be ahu goaron anakmu; bahen ma ahu songon anak gajianmu sada!
15:20 Jadi hehe ma ibana manopot amana. Alai dao dope ibana, nunga ditatap amana ibana; jadi asi ma roha ni i marnida ibana, hatop ma ditomu, dihaol jala diumma.
15:21 Gabe ninna anak i ma mandok ibana: Amang, na mardosa do ahu tu banua ginjang nang dompak ho; ndang tama be ahu goaron anakmu!
15:22 Alai ninna ama i ma mandok naposona: Haru, boan hamu ma ulos na dumenggan, salini hamu ma ibana; tintin ma lehon hamu tu tanganna dohot sipatu tu patna!
15:23 Jala boan hamu ma anak ni lombu na pinamokmok i; potong hamu ma i, naeng mangan hita marlas ni roha.
15:24 Ai naung mate do anakkon gabe mangolu; naung mago ibana, gabe jumpang muse. Jadi mamungka marlas ni roha ma nasida.

Ep. 1 Johanes 4:17-21
4:17 Disi ma gabe tipak holong ni roha i di bagasan hita, pola marhiras ni roha hita di ari paruhuman i; ai songon Ibana, songon i do nang hita di portibi on.
4:18 Ndang adong biar di bagasan holong ni roha i; alai dipabali holong ni roha naung rimpas i do biar i. Ai na bernit do anggo biar; jala ndang rimpas holong ni roha ni halak na mabiar.
4:19 Marroha holong ma hita, ala Ibana jumolo mangkaholongi hita!
4:20 Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?
4:21 On do patik na tajalo sian Ibana: Na mangkaholongi Debata, i ma na mangkaholongi nang donganna

Patujolo

Turpuk on (ay. 11-32) ima parumpamaan taringot tu anak na mago (anak yang hilang). Tardok do turpuk on songon sada parumpamaan na mansai jotjot ditaringoti dibagasan parpunguan ni halak Kristen. Molo tapamanat turpuk on, sasintongna dang adong sahalak pe sian anak na dua i na gabe boi sitiruon. Duansa do na rap mago, siahaan  i mago dibagasan, sianggian  i mago di ruar, Na boi gabe sitiruon i ma holan Ama na manghaholongi anakna i do.. Alani dumenggan do molo tabehen  judul ni parumpamaan on Ama Parholong Roha. Ama i, ima martudu-tudu tu  Debata, Ama Parasiroha, Ama Parholong Roha, na gabe Ama ni saluhut jolma. Songon dia do Debata manghaholongi hita, jala boha do hita merespon hologNa i? i ma nananeng tataringoti di jamita on.

Hatorangan
Turpuk on manaringoti tarigot tu sahalak ama na adong dua anakna. Dipangido sianggian i ma parbagianna sian arta ni amana i, dungi dibagi amana i ma warisan tu anakna na dua i. Somal do i masa di halak Israel (songon i nang di halak Batak), boi do dibahen parbagian ni arta di tingki mangolu dope natorasna. Songoni ma na masa di turpuk on, dapotan ma anak sianggian i sapartolu sian arta ni amana i (Songon i ma aturanna di Israel, molo adong anak na dua, sibagi tolu ma arta i, molo adong anak na tolu sibagi opat ma arta i, jala dua bagian ma di anak siahaan)[1]

Dungi, digadis anak sianggian ma parbagiannna i, jala laho ma ibana mangaranto tu luat na dao. (ay. 13). Dipasuda ma disi tuhor ni parbagianna i, dipansuasaehon tu angka hisap-hisap ni dagingna (berfoya-foya), gabe suda ma sude jala pogos ma ibana jala anturaparon. Masa muse ma haleon potir di luat i, diluui ibana ma ulaonna asa boi mangan. Molo tabereng di ay 15, gabe marmahan babi do ibana, na patuduhon ia anak sianggian i tu ruar ni Israel do ibana mangaranto, ai molo di bangso Israel dang adong halak marmahan babi. (haram do babi di halak Israel). Tung mansai porsuk di ditaon ibana disi, pola do disangkapi ibana mangallang ampas ni indahan ni babi  i, alai tong dang adong na mangalehonsa tu ibana (ay. 16).
Sada parngoluon na mansai kontras, molo dipatudoshon tu tabo ni parngoluonna uju di bagas ni amana na jolo, lomona mangan dohot modom, dang adong na hurang di ngoluna. Hape nuaeng dihilala ibana ma hinaporsuk ni ngolu na manjo-anjo di luat ni halak.
Alani haporsuhon i, gabe tubu ma rohana mulak tu jabu ni amana, alai ndang dihirim ibana be songon sahalak ianakkon na berhak di bagas dohot arta ni amana, alai gabe anak gajian nama dihirim rohana di bagas ni amana i (ay. 19). Di bangso Israel, naginoaran halak gajian tung mansai na lea do i, tumagon dope gabe naposo (budak atau hamba) sian halak gajian. Ai molo naposo, dirajumi dope i songon bagian ni keluarga ni induk somang, alai molo halak gajian ndong dianggap nasida songon i. Alai molo tung pe songon i, naung rade do ibana manjalo asal ma boi mangan.
Alai, molo tajaha di ay. 20…du, di luar dugaan do panjangkonon ni amana i tu ibana, pintor ditomu, dihaol jala diumma amana i do ibana. Jala dipatupa ma pesta penyambutan na mansai balga ala nil as ni rohana, jala didok “Ai naung mate do anakkon gabe mangolu; naung mago ibana, gabe jumpang muse.”.
Ndang na so diboto amana i pangalahona, dohot angka arta naung suda dipansuasaehon ibana, alai ala holong ni rohana tu anak na i, gabe dihukkupi i do angka pangalaho ni anakna na so hasea i. Ai nungga mansai leleng amana i paima-imahon hamumulak ni anak nai. Jala ala ni las ni rohana dilehon ma tu ibana ulos na dumenggan songon symbol ni hasangapon, tintin tu  tanganna songon symbol ni hak dohot huaso, dohot sipatu tu patna songon symbol ni par-ianakhon-on.

Sipahusor-husoron dohot hadomuan tu Epistel
  • Molo tabereng konteks ni umpama on, Amana i, ima gombaran ni Debata Ama parholong roha i, jala anak sianggian i, ima na manggombarhon angka halak na pogos, na mapitung, na pangpang, na anturaparon, na huliton, rakayat jelata, dna. (Na digoari angka halak Parise dohot Siboto surat do nasida halak pardosa ), Angka sijalo beo, halak sileban (kafir). Ima angka halak na targoar kaum marjinal, alai gumodang do sian nasida na dijangkon Debata marhite anakNa Jesus Kristus. Diboto Debata do nasida angka pardosa, diboto Debata do boha ngoluna nasida na sai mangoloi hisap-hisap ni portibion. Alai, taida ma balga ni holongNa i do na manghukkupi saluhutna i. Marhite holong ni Debata na so hatudosan i, gabe olo manjangkon angka halak pardosa.
  • Boi do muse tabereng ngolu ni anak sianggian on, songon halak pardosa na mansuasaehon angka silehon-lehon ni Debata dibagasan ngoluna, dipangke i laho mangoloi angka hisap-hisap ni portibion, gabe mago ma ibana jala madabu tu haporsuhon. Alai na rade do Debata manjangkon hita dibagasan las ni roha, molo olo hita mulak tu Ibana.
  • Di epistel, 1 Joh 4 : 19, didok :” Marroha holong ma hita, ala Ibana jumolo mangkaholongi hita!”. Debata do naung parjolo manghaholongi hita, alani ingkon haholonganta ma Ibana marhite na manghaholongi donganta,  ido asa didok di 1 Joh 4:20-21 i, “Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana? On do patik na tajalo sian Ibana: Na mangkaholongi Debata, i ma na mangkaholongi nang donganna”. Ima na ingkon sihangoluhononta, asa tahaholongi ma donganta, taurupi ma na ingkon siurupan.
  • Ima barita las ni roha na  di hita di tingki on, Debata Parasiroha Parholong roha na sumurung i, olo manjangkon hita, na manalpuhon saluhut dosanta, manomu-nomu hita jala mamboan hita bongot tu parsaoran na badia di harajaonNa i, jala dibasa-basahon tu hita jambar haluaon marhite na dijangkon hita gabe anakNa. Asal ma olo hita manolsoli dosanta jala mulak tu dalanNa na gok dame dohot las ni roha i. Ai pardenggan basa jala parasi roha do Debata, songon asi ni amaama tu angka anakna asi ni roha ni Jahowa di angka na mangkabiari Ibana. (Psalm. 103:13). AMEN !




[1] http://batumamak.blogspot.com/2011/10/18-trinitatis.html

Tidak ada komentar:

Poskan Komentar

HTML