Selamat datang di blog sederhana ini, kiranya menjadi berkat bagi kita semua

Selasa, 01 November 2011

Epistel Minggu 06 Nop 2011

MANGOLU DIBAGASAN UHUM 
DOHOT HOLONG NI ROHA 

Ep. Mika 6:6-8
6:6 Marhitehite aha tarbahen ahu mandapothon Jahowa, marsomba ahu tu Debata na di ginjang? * Marhitehite angka pelean situtungon ulaning ahu manjumpangkon ibana marhitehite anak ni lombu, angka na marumur sataon ulaning?
6:7 Lomo do ulaning roha ni Jahowa mida hambing tunggal marriburibu? Manang mida angka sunge miak marloksaloksa? Lehononku do ulaning anak buhabajungku abul ni pangalaosingki? Parbue ni butuhangku ulaning abul ni dosa ni rohangku?
6:8 Nunga dipabotohon ibana tu ho, ale jolma manang aha na denggan, jala manang aha * na niluluan ni Jahowa sian ho, nda holan * na mangulahon uhum dohot holong ni roha di habasaon, jala marpangalaho haserepon maradophon Debatam

Hatorangan : 

  • Panurirang Mika ima na satingki dohot Panurirang Jesaya, na rap mangula do nasida di Jerusalem hira-hira taon 742 – 687 SM, na ro do ibana manurirangi sian huta Maressa Gat, hira-hira 30 Km sebelah barat Jerusalem. Goar “Mika” marharoran do i sian hata Heber “Mikayahu” na marlapanan : “tung ise ma na songon Jahowa?” (Pat. Mik 7:18). Turpuk Mika 6:6-8 on, boi do dohonon gabe songon sada pangarimpunan sian sude na hinatahon ni angka panurirang di tingki i, asa diboto bangso i, ia na pinangido ni Debata marhite angka panurirang, ima asa mangolu nasida dibahasan uhum (hatigoran) dohot holong ni roha dibagasan habasaon, jala dibagasan haserepon ni roha maradophon Debata. Jahowa (ay. 8).
  • Dibagasan parngoluon ni halak  Kristen, adong do dua pangantusion na ekstrim taringot tu na mangulahon lomo ni roha ni Debata, ima :
  1. menekankan pentingnya ibadah ritual dan liturgis Kristen yang baik, indah dan sempurna. Pangantusion na songon on ima na sai berfokus tu pelaksanaan ibadah na uli jala denggan, tata ibadah na teratur, waktu na terjadwal, tempat ibadah na permanen dohot pelean na hombar tu aturan na ditontuhon. Ai dirajumi nasida marhite ibadah na songoni do na dihalomohon Debata.
  2. menekankan pentingnya kehidupan praktis dari iman Kristen.  Pangantusion na songon on ima na mandok ndang pola ringkot angka penataan manang pengaturan ritual ibadah na teratur, ndang pola ringkot jolma ingkon tu gareja ganup minggu dohot pasahathon pelean hombar tu aturan. Na rumingkot ima praktek kehidupan (pangulaon) dibagasan ngolu siganup ari. Ai i do na dihalomohon Debata.
  • Antong, songon dia sasintongna na nidokna  ibadah yang berkenan di hati Tuhan”.  Ritual ibadah na denggan jala na tertata rapi do, manang sae do holan praktek dibagasan ngolu siganup ari na konkrit?. Molo taida di turpuk Mika 6:6-8 on na mandok : "Marhitehite aha do tarbahen ahu mandapothon Jahowa?.... Marhitehite angka pelean situtungon do ulaning, manang marhitehite anak ni lombu? Lomo do ulaning roha ni Jahowa mida hambing tunggal marriburibu? Manang mida angka sunge miak marloksaloksa? Lehononku do ulaning anak buhabajungku abul ni pangalaosingki? Parbue ni butuhangku ulaning abul ni dosa ni rohangku?. Nda nunga dipabotohon Jahowa tu jolma i manang aha na denggan, jala  na niluluan ni Jahowa sian ho, nda holan na mangulahon uhum dohot holong ni roha di habasaon, jala marpangalaho haserepon maradophon Debatam?”. Sian sungkun-sungkun i, adong kesan na dumenggan dope angka na mangulahon uhum dohot holong ni roha, habasaon dohot haserepon ni roha di adopan ni Debata, sian angka “ritual ibadah” molo gabe holan  hasomalan sambaing do i (rutinitas).
  • Di bagian na asing di Padan na robi didok do : “Tung tagamon ma lomoan roha ni Jahowa mida pelean situtungon dohot sipanganon, asa mida panangihon di suara ni Jahowa? ( 1Sam 15:22). Alai di Maleakhi 1:6-8, didok Debata do asa tong dipatupa ibadah ritual yang baik, indah dan sempurna. Dipangido Debata do sagu-sagu na dumenggan dohot pelean situtungon na so martihas sian bangsoNa i. Dipatuduhon i do, na lomo do roha ni Debata manjalo angka pelean na tama sian bangsoNa i, alai unang ma alani angka pelean i, gabe lupa nasida managihon hata ni Debata marhite angka panurirangNa. Di Padan na Imbaru pe didok do : “Aha ma gunana, ale angka donganku, molo didok halak, di ibana do haporseaon; alai ndang adong di ibana pangulaon. Tarbahen do haporseaon i paluahon ibana?” (Jak 2:14), Lapatanna marhite na manangihon hataNa i, gabe tubu ma haporseaonta, alai ndang sae holan disi, ingkon dilulahon ma (marparbue) hombar tu lomo ni roha ni Debata asa singkop ngolu ha-kristenon-ta i.
  • Alani, na nidokna sian saluhutna i ma, na dihalomohon Debata do  parture ni angka ibadah dohot pelean na denggan, tingkos, uli jala na singkop, alai ndang sae holan i, dihalomohon Debata do muse pangulaon (praktek) dibagasan ngolu si ganup ari marhite na manghangoluhon  uhum/hatigoran, hasatiaon dohot haserepon ni roha di bagasan holong ni roha na tama di adopan ni Debata. Molo tung pe adong taida angka turpuk na sai hira na mandok umporlu do ritual ibadah, manang na mandok umporlu do pangulaon, tabereng ma i hombar tu konteksna, asa unang sala mangantusi hita. Alani do asa didok Apostel Paulus di Rom 12:1 “Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha”. AMIN !

Tidak ada komentar:

Posting Komentar

HTML