Selamat datang di blog sederhana ini, kiranya menjadi berkat bagi kita semua

Kamis, 23 Juni 2011

Sermon Epistel Minggu 26 Juni 2011

MANGANTUSI DOHOT MANGULAHON 
Ep. : Johannes 5 : 39-47
 5:39   Didiori hamu do angka surat i, ai diparbaga rohamu, dapot hamu do disi hangoluan na salelenglelengna; jala Surat i do tutu mangkatindangkon Ahu.
5:40     Alai ndang olo hamu ro manopot Ahu, asa dapotan hangoluan hamu nian.
5:41     Ndang adong hujalo hasangapon sian jolma.
5:42     Alai nunga hutanda hamu, na so ditiop hamu di bagasan hamu holong ni roha ni Debata.
5:43    Ro do Ahu marhitehite Goar ni Damang, gabe ndang dijangkon hamu Ahu. Alai molo ro na asing marhitehite goarna sandiri, jangkononmuna do anggo i.
5:44    Songon dia ma antong tarbahen hamu gabe porsea, ai na masijaloan sangap do hamu sama hamu; alai anggo sangap na sian Debata na sasada i, ndang dilului hamu.
5:45     Unang dirimpu rohamuna, Ahu mangaluhon hamu tu Ama i. Adong do na mangaluhon hamu; i ma si Musa, haposan ni rohamuna i.
5:46     Ai aut na porsea hamu di si Musa, porsea ma hamu nang di Ahu; ai taringot tu Ahu do disurathon.
5:47     Alai molo so porsea hamu di suratna i, tung porsea ma hamu di hatangki

Patujolo
Boasa godang halak naung manjahai jala mangantusi hata ni Debata marhite Buku na Badia i alai ndang mangolu jala mangula dibagasan hasintongan? Godang do angka na malo, angka sarjana dohot teolog na mambagasi Buku na Badia i, alai ndang adong panghorhonna dibagasan ngolu siganup ari. Songoni ma halak Jahudi, angka Parise, Saduse dohot Sibotosurat, na tung mansai bagas mangantusi sude na tarsurat di Padan na Robi i. Didiori nasida do angka pangantusion/tafsiran  taringot tu angka surat ni si Musa dohot angka panurirang, alai ndang ditanda nasida ise do na nidokna disi.

Hatorangan
Molo taauhon tu dirinta, boha do hita? boi do hita mangantusi jala mananda Jesus marhite hataNa i? sementara angka na malo, angka  teolog manang sibotosurat naung mambagasi angka hata i dang mananda nasida di Jesus ? Antong tabereng  ma jolo aha do lapatan ni hata ni Debata na tarsurat di Buku na Badia i tu bagasan ngolunta?
  • Didok Ap. Paulus do di II Tim 3:16 :“Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran”. Lapatanna ingkon tahaporseai do na tutu situtu do na tarsurat i hata ni Debata, na martujuan laho padengganhon ngolunta. Alani ndang tutu halak na mangantusi hata ni debata molo so denggan ulaonna.
  • Di nasahali disungkun halak Jahudi do Jesus “Sian dia ma diboto On hata ni Debata, so manang diguruhon?”, alai dialusi Jesus ma nasida : “Anggo podangku, ndada sian Ahu sandiri, sian na marsuru Ahu do. Ganup na olo mangulahon pinangido ni roha ni I, botoonna ma, manang na sian Debata podangki, manang na huhatahon i sian diringku sambing.” (Joh 7:15-17). Lapatanna di lehon Debata do parbinotoan mangantusi hataNai tu angka halak na olo mangulahon lomo ni rohaNa. Ai marhite pangulaon do boi tarida panghorhon ni hata ni Debata.
  • Efesus 3:4 mandok :”Laho manjaha i, dapot timbangonmuna pangantusingku di hahomion ni Kristus”. Lapatanna marhite na manjaha Buku na Badia i, gabe dapot hita panimbangion na sintong taringot tu hahomion ni Kristus.
Antong molo songon i, boasa halak Jahudi naung manjahai dohot mambagasi angka na tarsurat i sian najolo, alai ndang diantusi nasida lapatanna jala ndang diulahon? Ima na gabe sipahusor-husoronta di bagasan  turpuk on. Ndang boi taantusi hata ni Debata molo sian pikkiranta sandiri, alai ingkon do marhite hasintongan, haserepon dohot haporseaon.

  • Ay. 39-41, Didiori nasida do surat i, jala diboto nasida do dapot do disi dalan, hasintongan dohot hangoluan, alai tingki didok Jesus : “Ahu do dalan i dohot hasintongan dohot hangoluan” (Joh 14:6), ndang olo nasida porsea. Boasa?
  1. Ala ndang ditanda nasida Jesus, ai na pinarsinta nasida “pemimpin politik” do, na boi paluahon nasida sian gonggoman ni Rom, ndang “Sipalua Tondi”.
  2. Na hinirim nasida ima harajaon portibi do, ndang Harajaon ni Debata na ungkap tu angka halak na porsea.
  3. Ai sian hajolmaon do nasida mananda Jesus, sahalak na ro sian Nazaraet, anak ni si Josep tukang hau i.
  4. Dirajumi nasida do ndang tama halak na so “berpendidikan” gabe sahalak Guru (Rabbi). 
  • Ay. 42-43, Dijahai nasida do angka patik i, jala diulahon. Alai holan “pangulaon parduru” do na pinatuduhon nasida,  aturan sambing do i dirajumi nasida,  ndang dibagasan holong nasida mangulahon patik i. Hape siboto roha do Debata.  
  •  Ay.44, Pangiburuon dohot late ni roha do na mangonjar angka Parise dohor sibotosurat i  manulak Jesus, ala diida nasida do “pengaruh’ ni Jesus di bangso i mengancam posisi dohot pengaruh nasida sandiri.(Pat.  Mark. 15:10)
  •  Ay. 45-47, Mansai godang do panurirangon dohot panindangion di Buku na Badia taringot tu Debata, AnakNa Jesus Kristus dohot HataNa  na ingkon siulahononta, sungkun-sungkunna ndang be “boha do hita mangantusi i?” alai  “boha do hita boi jala manjalo i songon sada hasintongan?
  1. Ingkon dibagasan haserepon dohot tulus ni roha do hita asa boi tarjalo rohanta angka na tarsurat  i songon sada hasintongan. Molo ndang serep jala tulus rohanta, ndang tarjalo hita i, tung pe sai tajahai ganup ari.
  2. Pangantusion na hurang taringot angka teologi ndang manghurangi pangantusionta taringot tu hasintongan i, alai haotoon na disengaja do molo taalo hasintongan i holan alani pangantusion na hurang taringot angka penafsiran teologi.
  3. Alani persoalanna sasintongna ndang ala na hurang pangantusion, alai ala na hurang haporseaon do. Songon halak na mora naung mate i, mangidohon tu si Abraham asa disuru nian halak mandapothon angka hahanggina paboahon asa dipauba roha nasida, asa unang dohot nasida tu parhansitan i. Alai disok si Abraham :  “Adong do di nasida surat ni si Musa dohot angka panurirang; angka i ma ditangihon!....,Anggo so ditangihon nasida si Musa dohot angka panurirang, ndang tagamon mangoloi nasida”. (Lukas 16:19-31).
Laos ido na nidok ni Jesus di turpuk on, molo ndang porsea nasida di surat ni Musa i, ndang tagamon porsea nasida di hata ni Jesus. Ai na manghaindangkon Jesus do angka surat i.

Sipahusor-husoron

Boasa dope boi halak ndang porsea jala ndang olo mangulahon hombar tu na niajarhon  ni Jesus i dibagasan partingkianta sinuaeng on?
  1. Diboto nasida hasintongan i alai ndang diulahon ala dihuphupi roha portibion nasida.
  2. Diboto nasida do patik i, alai ndang dihaholongi nasida Debata, Dirina sandiri dohot hagiot ni portibion do dihaholongi nasida
  3. Holan hasonangan portibion do dilului nasida, holan marpanghirimon tu portibi on do nasida, ndang tu Debata.
  4. Diboto nasida na hinalomohon ni Debata, alai ndang peduli tu angka hataNa.
Antong unang ma hita songon i, alai tajahai, tatangihon jala tapeop ma angka hataNa i, asa taboto mangantusi dohot mangulahon hombar tu lomo ni rohaNa. Tatanda ma Debata dohot Jesus Kristus marhite na tarsurat i. Taparangehon ma i, ai i do hangoluanta. AMEN!


Tidak ada komentar:

Poskan Komentar

HTML