JAMITA MINGGU 05 JUNI 2011

JESUS DO AEK HANGOLUAN

Joh. 7 : 37-38

7:37 Dung i di ari pesta na parpudi na sumangap i, jongjong ma Jesus disi, dipagogo ma soarana mandok: Molo adong na mauas, tu Ahu ma ibana ro minum!

7:38 Songon na nidok ni Surat i: Angka batang aek na mangolu do mabaor sian na porsea di Ahu.

Patujolo

Evangelium Johannes ima sada evangelium na mansai unik martimbangkon tu na tolu evangelium na asing ima Mateus, Markus dohot Lukas. Alana holan di Ev. Johannes on do na manurat taringot tu panghobasion ni Jesus di huta Judea songon i nang di Jerusalem, laos Evangelium on do na singkop patuduhon taringot tu kepribadian ni Jesus. Panurat ni Evangelium on ima si Johannes, sisean haholongan ni Tuhan Jesus, anak ni si Zebedeus. Secara khusus dibaritahon Evangelium on do panghaholongi ni Jesus tu Portibion (Joh. 3:16).

Adong 3 tujuan ni Evangelium Johannes on, ima :

• Asa porsea halak Jesus do MEsias i, Anak ni Debata, jala marhite haporseaonta i, gabe dapotta ngolu na manontong ro di salelengnilelengna dibagasan goarNa (pat. Joh. 20:31)
• Laho mangalo angka ajaran sesat na berkaitan tu sifat, kepribadian dohot hadebataon ni Jesus, ima na niajarhon ni sahalak Jahudi na mansai berpengaruh na margoar Cerinthus. 
• Laho pahothon huhut patoguhon haporseaon ni ganup halak naung porsea di Ibana asa unang munggil-unggil tung pe godang angka pengajaran palsu na binege nasida.

Konteks ni turpuk on ima ari parpudi pesta Parlape-lapean ni halak Jahudi, na dibagasan pangaleleon ni halak Jahudi do Jesus, ima naeng mamunu ibana alani pangajarionNa taringot tu harajaon ni Debata, dohot panghobasionNa na pamalum angka na marsahit, palaohon tondi na hodar, dna. Laos sian tonga-tonga ni na torop na marpesta i do jongjong Jesus huhut didok Ibana marhite soara na gogo asa tarbege sahat tu na hundul di barisan parpudi : “Molo adong na mauas, tu Ahu ma ibana ro minum! Songon na nidok ni Surat i: Angka batang aek na mangolu do mabaor sian na porsea di Ahu”.

Aha do nanaeng pinatorang ni Jesus marhite pandohan i? Aha do na naeng guruhononta marhite turpuk on, jala songon dia aplikasina tu partingkian nuaeng on?

Hatorangan

1.      Ay. 37, Hata “ Molo adong na mauas”, na marlapatan do i Jesus membuka kesempatan na mansai arga situtu na holan sahali seumur hidup jala na so mungkin terulang kembali tu ganup halak, ndang dibatasi umur, gender, kasta, golongan, status dohot ras, asa ro ganup halak tu Ibana tanpa pengecualian. LApatan na umbagas sian pandohan on ima : Jesus ndang holan manjou halak na mausa secara fisik dohot spiritual, alai na tarlumobi lapatan ni “mauas” na paling dalam ima kepuasan spritualitas, kepuasan rohani, pemenuhan total, penerimaan na utuh na berkaitan tu pemenuhan dibagasan holong, kesuksesan, harga diri na memang sungguh-sungguh boi dapoton holan marhite Jesus.

1. Hata “ro” dohot “minum”, ima kata kerja dalam bentuk perintah masa kini, jadi ndang na marlapatan “gokhon/undangan”, alai perintah do in a membutuhkan tindakan dibagasan tanggung jawab dohot kesadaran na terus menerus ndang mansohot. Lapatanna ingkon terus menerus do hita ro tu adopan ni Debata jala mian dibagasan Ibana, asa sombu “uasta” (dapotan kepuasan rohani). 
2. Ay. 38, Di ayat on dipatorang Jesus do songon dia ciri khas ni halak na porsea di Ibana,  di ibaratkan do i songon “batang aek na mangolu”. Halak na porsea ingkon bermanfaat, berguna terhadap sesamanya. Ingkon boi do hita menyumbangkan hapistaran, parbinotoan, talenta dohot profesinta untuk kepentingan orang lain. Molo tasumbangkon angka i, ndang na gabe moru i sian hadirionta, alai gabe lam mengalir do i jala martamba-tamba, ndang olo kering.

Aplikasi

Sada perintah na mansai arga nunga dipasahat Jesus tu sude na mandohoti pesta parlape-lapean ni Jahudi i, asa olo nasida mangalusi tawaran ni Jesus “asa molo adong na mauas, tu Ahu ma ibana ro minum”. Sasintongna sada kesempatan na arga situtu do i di nasida.

Tung mansai maol do dapotta kesempatan sisongon i di partingkianta nuaeng on, tarlumobi tawaran dalam bentuk perintah ro sian halak na tumimbo sian hita, na memiliki kuasa dohot na mangalehon jaminan tu manang ise na mausaasa rot u Ibana minum jala ndang uasan be saelelng ni lelengna. Ndang pola adong prasyarat laho rot u Ibana,sude doganup hala boi rot u Ibana tanpa kecuali. Antong binsan adong penawaran na songon i, tajalo ma i marhite na mangulahon lomo ni rohaNa. Molo nunga dapotan hita, unang ma holit laho paboahon tu angka dongan na so umboto manang na so umbege hata i dope. Unang mabiar hita, molo lam godang halak  na ro tu Ibana gabe so dapotan hita, ai mabaor do i songon batang aek na mangolu, na so hea koring, terus mengalir tu angka na porsea di Ibana.

Molo nunga minum hita sian ibana, manang boha pe halak na jumonok tu hit ape gabe merasa nyaman do manghatai dohot hita, dao angka perasaan curiga dohot keragu-raguan.Alani ingkon rade do hita mamboan aek hangoluan it u halak na jumonok tu hita saotik-otikna sahalak dibagasan sadari. Asa molo ro pe Ibana paduahalihon, nunga sude hita didapot songot batang aek na mangolu i. AMEN

Sumber : Pdt. Debora Purada Sinaga, MTh (Jamita Minggu Exaudi, Impola Jamita HKBP No. I/Jan-Juni 2011)