Jamita Minggu 26 Juni 2011

MARROHA HOLONG MA HITA

Ev..: 1 Joh 4 : 16b-21

4:16b   Debata do haholongon i; jala halak na mian di bagasan haholongon, i do na mian di bagasan Debata jala Debata di bagasan ibana.

4:17     Disi ma gabe tipak holong ni roha i di bagasan hita, pola marhiras ni roha hita di ari paruhuman i; ai songon Ibana, songon i do nang hita di portibi on.

4:18     Ndang adong biar di bagasan holong ni roha i; alai dipabali holong ni roha naung rimpas i do biar i. Ai na bernit do anggo biar; jala ndang rimpas holong ni roha ni halak na mabiar.

4:19     Marroha holong ma hita, ala Ibana jumolo mangkaholongi hita!

4:20     Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?

4:21     On do patik na tajalo sian Ibana: Na mangkaholongi Debata, i ma na mangkaholongi nang donganna.

Patujolo

Konteks ni jamita on ima na ro do tingki i tu angka halak naung porsea i angka panurirang pargapgap, Antikristus dohot parpoda haliluon,  ima angka na mangasahon tondi na so marhatopothon Kristus. Masa do pangajarion na mamparsualhon  taringot tu hadirion ni Jesus na sasintongna, anak ni Debata do Ibana manang jolma biasa? Jala boha do hadebataonNa i boi dipadomu tu hajolmaonNa?. Marhite angka pangajarion na songon  i boi do gabe ganggu roha ni angka halak na porsea i jala lilu nasida, ido alana disurathon Apostel Johanes turpuk on laho manogu-nogu roha nasida asa unang madabu tu angka haliluon na songon i. Mansai ringkot do turpuk on lao patoguhon haporseaon ni jolma asa unang ganggu ala ni angka pangajarion haliluon. On ma na gabe alus na sintong laho mangalo  sude poda haliluon i, ima asa masihaholongan nasida songon tanda na mangihuthon Kristus, ai  ido karakter ni Debata dibagasan Jesus Kristus, ima haholongon. Marhite holong i do boi tatanda ha-Debata-on ni Kristus, ala nunga jumolo hita dihaholongi Ibana. Alani molo nunga masihaholongan hita, tandaonta ma marhite tondi i, ise do Kristus i sasintongna, Ima Debata Parholong roha i, jala manang ise na naeng mananda Kristus ingkon do marroha holong, Ai Debata do haholongon i. (Ay.16b).

Hatorangan

• Songon dia do holong i? Didok Ap. Paulus do di I Kor 13:13 “Asa tolu do na hot: I ma haporseaon, pangkirimon dohot haholongon; alai haholongon do na umbalga i”. Antong songon dia do ro haholongon i? Dibagasan ngolunta on, ra nunga tapatuduhon holong i tu angka donganta dibagasan ngulunta siganup ari. Alai ndang boi dope i tapatudos tu holong na binahen ni Jesus Kristus tu hita. Ai holong na di hajolmaon on ima holong na boi muba-uba do hombar tu situasi, ala hinorhon ni parsaoran pardagingon dohot emosional na olo munggil-unggil do holong ni hajolmaon i. Holong na sintong ima holong na tubu dibagasan roha ala panandaonta di Debata na manghaholongi hita, na mangalehon  anakNa na sasada i mate tarsilang humophop hita, ima Jesus Kristus na olo manaon na porsuk, tarsilang jala mate Ibana ala holong ni rohaNa tu jolma pardosa i. (Pat. Joh. 3:16). Holong na sintong ima holong na so marpambuat, na ro sian roha na ias, ndang manghirim asa dapotan balosna, alai dibagasan tulus ni roha mangulahon holong i nionjar ni holong na ro marhite tondi ni Debata.
• Kristus do sitiruon taringot tu holong i. Molo nunga tajalo holong sian Kristus, ingkon marparbue ma i marhite na mangolu hita dibagasan holong.  Ima holong ni roha na bulus sian nasa roha dohot sian nasa ate-ate, holong na hot ndang holan sangombas. Ingkon sude do halak na porsea marsiajar laho maniru holong naung binahen ni Kristus i.
• Holong na marpanghirimon, Halak na mangolu dibagasan holong, ima halak na marpanghirimon di Debata. Ai ndang  holan panghirimon di portibion na taeahi asa taulahon holong i, alai dao umbalga sian i, ima panghirimon di las ni roha dohot hamonangan, tumpal sijaloonta di tingki ari paruhuman i (Pat. 1 Kor. 15:19). Boi do hita mangeahi angka na ringkot di portibion saleleng mangolu hita, alai ndang i sihirimonta na umporlu, alani molo mangula pe hita di portibion mangalului ngolu siganup ari, unang ma gabe mago holong i sian hita alani hagiot ni partibi on. Alai marroha holong ma hita di sude panggulmiton ni ngolunta, asa dohot donganta dapotan pasu-pasu marhite na masihaholongan i.
• Holong na marparbue, Holong ima parbue ni panandaonta di Debata naung parjolo manghaholongi hita. Alani molo dirajumi rohanta do naung jumolo Debata manghaholongi hita, tama ma hita manghaholongi Ibana.  Boha do bahenonta manghaholongi Debata na so tarida i? Ima marhite na manghaholongi donganta jolma na tarida di jolonta. Ai ido pangarimpunan ni patik i, Ima holong maradophon Debata dohot holong maradophon dongan jolma. Na manghaholongi dongan, na manghaholongi Kristus do i. (Pat. Mat 25 : 40). Alani, suhat-suhat ni holongta maradophon Debata ima tarida do i marhite holongta tu dongan jolma. Ido asa didok di Ay. 20-21, “ Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?......Ai na mangkaholongi Debata, i ma na mangkaholongi nang donganna”. 
• Ise do sihaholongan? Ndang mardiaimbar jolma i dihaholongi Debata, na pogos-na mora, na poso-na matua, na bontar-na birong, na porsea dohot na so porsea, na sintong dohot pardosa. Antong molo didok : “Haholongi ma donganmu..”, Dongan na dia na nidokna disi? Dohot do  dongan na marsogo ni roha mida hita, na mambahen hansit rohanta, na patupahon angka ulaon na so denggan dompak hita, na so olo masiseaan dosa dohot hita, na mambahen hita gabe musu? ALUSNA : Sude do jolma na ingkon sihaholonganta. Dang holan na manghaholongi hita, alai ingkon tu sude halak do patuduhonnta holong na sian Kristus i, ai nunga jumolo Kristus manaon haporsuhon alani dosanta, alai hot do holongna i tu hita na jolo, sadarion sahat ro di saleleng ni lelengna.

Sipahusor-husoron

• Diunjuni Parise do Tuhan Jesus uju di sungkun nasida dia do patik raja sian angka patik i? Dialusi Jesus ma nasida, on do patik raja sian sude patik i:  Haholongi ma Tuhan Debatam sian nasa ateatem, sian nasa hosam dohot sian nasa roham! Jala Haholongi ma donganmi doshon dirim!, Asa Patik na dua on do mangkangkam nasa patik dohot hata ni panurirang. (Mat 22 : 34 – 40).
• Antong angka dia ma haholongon i? (Pat. 1 Kor 13:4-7)

a.       Na lambas  jala na sorta,

b.      ndang na mangiburu,

c.       ndang tenga,

d.      ndang dipaburnangburnang dirina,

e.       Maradat situtu,

f.       ndang na ahut,

g.      ndang olo pangarimason,

h.      ndang dipajujurjujur na jahat,

i.        Ndang las rohana mida hageduhon;

j.        Tongtong manghalashon hasintongan,

k.      Saluhut do ditanom rohana,

l.        saluhut do dihaporseai, dihirimi jala ditaon

• Ndang na ra mansohot haholongan i saleleng ni lelengna. Molo mansohot pe angka panurirangon, parhataan dohot parbinotoan, alai Holong i hot do ro disalelengni lelengna. Antong gabe parroha holong ma hita. Masihaholongan ma hita sama hita, Ai “Na mangkaholongi Debata, i ma na mangkaholongi nang donganna”. AMEN !