Sermon Epistel Minggu 19 Juni 2011 (Trinitatis)

MANGHAMAULIATEHON HINABALGA NI PAMBAHENAN NI DEBATA 

Ep. : Psalmen  111 : 1-10

111:1 Pujionku ma Jahowa sian nasa roha di luhutan ni angka partigor dohot di huria i.

111:2 Balga do angka pambahenan ni Jahowa, hinalungunhon ni sude angka na lomo roha disi.

111:3 Hamuliaon dohot hasangapon do parulaonna i, jala hot do jongjong hatigoranna i salelenglelengna.

111:4 Nunga dibahen Ibana sada parningotan di halongangan angka na binahenna i, pardengganbasa jala parasi roha do Jahowa.

111:5 Nunga diparbohali angka na mangkabiari Ibana, diingot do padan binahenna i ro di salelenglelengna.

111:6 Nunga dipabotohon tu bangsona gogo ni pambahenanna i mangalehon tu nasida parjambaran ni angka parbegu.

111:7 Hasintongan dohot uhum do angka pambahenan ni tanganna, sintong do sude angka patikna i.

111:8 Hot do angka i ro di salelenglelengna, dibahen do angka i di bagasan hasintongan dohot habonaron.

111:9 Nunga ditongoshon Ibana haluaon tu bangsona, dipatik do padan binahenna i salelenglelengna, nabadia jala na songkal do goarna i.

111:10 Biar mida Jahowa do parmulaan ni habisuhon, maruli hapistaran na sumurung do sude angka na mangulahonsa; hot do baritana i ro di salelenglelengna.

Patujolo

Psalmen 111 on, ima puji-pujian taringot tu pambahenan ni Jahowa na mansai balga di ngolu ni halak Israel hatiha i. Dipungka do turpuk on dohot hata “Pujionku ma Jahowa” (Haleluya), na marlapatan ala naung ditanda par Psalmen on do pambahenan ni Jahowa di bagasan ngoluna, jadi tama ingkon pujion Ibana.           

Angka isi ni Psalmen on manggombarhon puji-pujian ala haluan ni bangso i sian tano Misir dohot ala pandonganion ni Debata na manogu-nogu nasida sahat tu na bongot nasida tu tano Kanaan. Alani adong do penafsir na mandok, ia Psalmen 111 on disurathon sahalak uluan ni bangso i, asa gabe ende puji-pujian tingki patanakhon buku 5 Musa (Ulangan) di angka parpunguan (ibadah) ni halak Israel di Sinagoge. Ima sada pamujion ala marhite sian pambahenan ni Debata tu nasida di tingki na uju i, gabe dapot roha nasida do habalgaon ni huaso ni Debata, jala dipabotohon ma i marhite Psalmen on tu sude bangso i.

Hatorangan

• Ay. 1-2. Patuduhon “cara’ ni par Psalmen i pasahathon hamauliateon ni rohana tu Debata, ima marhite na mamuji Jahowa sian nasa rohana, ndada holan pamujionna sandiri  alai dohot do pamujion ni saluhut halak angka partigor dohot huria i. Na marlapatan do i, pamujion i ingkon do dipatupa secara “berjamaah”, ala sude do nasida manjalo haulion sian pambahenan ni Debata na denggan i di pardalanan ni ngolu nasida. Pamujion tu Debata ndang holan ala ni pambahenanNa tu hita secara pribadi, alai  dohot do ala pambahenanNa tu saluhut halak na boi tarida sian pardalanan ni ngolu ni sude jolma secara umum.
• Ay.3, 4, 7, dan 8, ima patandahon karakter ni Debata, angka dia ma karakter ni Debata na porlu sitandaonta dibagasan ngolunta? Ima : Na marmulia jala na sangap do Debata,  pardenggan basa jala parasi roha, mangula dibagasan hasintongan dohot uhum jala hot ro di salelelng ni lelengna. Boasa ingkon tandaonta karakter ni Debata ? Asa taboto mangarimang-rimangi angka pambahenanNa i. Molo tatanda karakter ni Debata na songon i, gabe dapot hita ma pangantusion na tingkos taringot tu sude angka na pinamasa ni Jahowa di bagasan ngolunta. 
• Ay. 5, 6, dan 9. Ima angka pambahenan ni Debata di bagasan ngolu ni bangsoNa i, ima : Diparbohali Debata do angka na manghabiari Ibana (rezeki), dilehon Debata do tu nasida parjambaran ni angka parbegu (pusaka bangsa-bangsa), di tongoshon haluaon tu bangso i (kemerdekaaan). 
• Ay. 10.  Ditutup do Psalmen on dohot pandohan “Biar mida Jahowa do,….”, na marlapatan  asa tongtong marhabiaran tu Jahowa bangso i, ai molo dapot nasida pe angka habisuhon dohot hapistaran, jala tarbarita nasida songon sada bangso na pinillit, ndang alani pambahenan nasida sandiri i, alai silehon-lehon ni Debata do i tu nasida. Na boi do i unsaton ni Debata molo manimbil nasida sian angka dalanNa jala molo ndang dihabiari nasida Jahowa.

Sipahusor-husor on:

Di na mamungka Psalmen 111 on, tarida do “kesungguhan” ni par Psalmen on mamuji jala mandok mauliate tu Jahowa. Laos ditogihon do angka halak na humaliangna asa tongtong dohot mandok mauliate tu Debata. Alani tarida do balga ni hamauliateon dibagasan roha ni par Psalm on. Antong sian dia do ro hamuliateon  ni roha na songon i? Ima ala dirimangi par Psalm on do angka pambahenan ni Debata dibagasan pardalanan ni ngolu ni bangso i. Hita pe, molo tarimang-rimang i angka pambahenan ni Debata dibagasan ngolunta, tama do pujonta Debata jala marroha mauliate ma hita. Roha Mauliate i ma respon siala balga ni huaso ni Debata na mangula dibagasan ngolunta.

Dipatorang par Psalmen on do aha ma na niula ni Debata dibagasan ngolu ni bangso i, ima parjambaran di ngolu siganup ari, tano pusako na gabe inganan nasida songon tanda naung gabe bangso na malua sian parhatobanan. Aha do sangkap ni Debata patupahon i tu nasida? Ima asa lam ditanda nasida Jahowa marhite angka pambahenanNa na sintong i, jala ditanda nasida Debata marhite dengan basa dohot asi ni rohaNa naung jinalo nasida.

Molo tarimang-rimang i do pambahenan ni Debata dibagasan hasintongan, gabe tarida ma i di bagasan ngolunta. Angka halak na mananda huaso ni Debata dibagasan pardalanan ni ngoluna jalan manghabiari Ibana, ima na gabe dapotan habisuhon dohot hapistaran laho mandalani ngoluna.

Antong tarimang-rimangi ma sude pambahenan ni Jahowa dibagasan ngolunta asa tatanda karakter dohot huaso ni Debata, gabe taboto ma mamuji Ibana jala mandok mauliate siala sude denggan basa dohot asi ni rohaNa i.  AMEN