Renungan Epistel Minggu 4 Des 2011

SALPU PE LANGIT DOHOT TANO ON, ALAI HATA NI DEBATA NA SO TUPA SALPU

Lukas 21:28-33

21:28 Alai molo mamungka masa angka i, dirgak ma hamu; pasindak hamu ma ulumuna, ai nunga jonok haluaonmuna.

21:29 Jala dihatahon ma tu nasida umpama sada: Bereng hamu ma hau ara i dohot angka hau na asing!

21:30 Ia dung martunasi diida hamu, tandaonmuna do sian i, naung jonok partaonan las.

21:31 Suang songon i, ia dung masa angka i diida hamu, boto hamu ma, naung donok harajaon ni Debata.

21:32 Situtu do hatangkon tu hamu: Na so tupa salpu na sabangso on, so jolo songgop saluhutna i!

21:33 Salpu pe sogot langit dohot tano on, anggo hatangki na so tupa salpu

Hatorangan

Di turpuk Lukas 21 on, dihatahon Tuhan Jesus do taringot tu halelengse ni Jerusalem. Pola do didok Ibana : “… na ro ma angka arina, ndang tinggal disi dua batu martinditindi na so gargaronna” (21:6). Hatiha i, tung dibanggahon bangso Jahudi do hinauli ni Jerusalem dohot bagas joro naung dipajagar nasida dohot angka batu nauli.  Alai dipaingot Tuhan Jesus nasida, na laho salpu do saluhut  na i, alani asa jaga nasida, ai masa ma angka bangso maralohon bangso, harajaon maralohon harajaon. Tarlumobi tu angka siseanNa dipaingot Jesus do asa benget nasida managam na masa i, ai hosoman ni jolma do nasida alani na manghatindangkon Jesus.

Martudu-tudu do Lukas 21 on taringot tu na masa sogot, ai didok do  : Dung i masa ma angka tanda di mata ni ari, di bulan dohot di angka bintang pe; jala hapusohan ma angka bangso di tano on jala bobonosan, bahenon ni gasak ni laut i dohot galumbangna., humuntal ma angka hagogoon ni parlangitan. Dung i idaonnasida ma Anak ni jolma i ro marhitehon ombun mantat huaso dohot hasangapon godang. Alai molo mamungka masa angka i, dirgak ma hamu; pasindak hamu ma ulumuna, ai nunga jonok haluaonmuna”. (Luk 21:25-28).

Turpuk on, ima bagian ni jamita ni Tuhan Jesus di Dolok Jetun, dihatahon Jesus do tu angka siseanNa, parumpamaan taringot tu hau ara  dohot angka hau na asing. Molo dung martunasi hau i, ima tanda naung jonok partaonan las, laos songon i ma dipatudos Jesus na ingkon adong ma tanda-tanda naung jonok do harajaon ni Debata. Metafora na songon i nunga diantusi angka halak Jahudi sasintongna, ai diboto nasida do ia molo dung masa musim semi (spring), martunasi ma hau i, ima tanda na laho masuk ma tu musim panas (summer).

Marhite parumpamaan on, naeng paboaon ni Jesus do hinaringkot ni jolma i mangantusi angka tanda-tanda zaman. Songon sahalak partani na ingkon mangantusi tanda-tanda sadihari ari udan dohot ari logo, asa denggan angka suan-suanan na i tubu, songon ima jolma i pe ingkon mangantusi tanda-tanda  na binahen ni Debata di bagasan ngoluna asa rade managam tingki haroroNa i.

Boi do Debata mambahen angka tanda-tanda dohot mamangkulingi hita marhite ragam cara dohot angka na masa di portibion. Alai boha do hita mangantusi saluhut na masa i dohot kepekaan ni rohanta manangihon soara ni Debata na mamangkulingi hita? Boi do hita mangantusi sangkap ni Debata na manghuling marhite angka naposoNa, marhite angka dongan sahaporseaon, marhiet angka huriaNa dohot marhite na masa di na humaliang hita. Alai ingkon do marhite pandonganion ni Tondi Parbadia asa boi hita singkop mangantusi saluhutna i hombar tu sangkap ni Debata. Ndang tarantusi hita i molo sian pardagingon sambing, alai ingkon marhite mata partondionta do hita mamereng angka na masa i.

Ndang taboto andigan masa ari parpudi i, alai didok Tuhan Jesus : “dungo ma hamu tongtong mardongan tangiang, asa margogo hamu, pasiding saluhut na naeng masa i, laho jongjong di jolo ni Anak ni jolma“ (Luk 21:36.

Antong tahaporseai ma hataNa i, jala dungo ma hita mardongan tangiang, asa taantusi angka tanda na binahenNa i di ngolunta. Taungkap ma rohanta, asa bongot Ibana patuduhon angka sangkapNa, tatangihon ma soaraNa, ai didok do : “Salpu pe sogot langit dohot tano on, anggo hatangki na so tupa salpu” (Luk 21:33). SELAMAT ADVENT, AMEN !