Selamat datang di blog sederhana ini, kiranya menjadi berkat bagi kita semua

Rabu, 30 November 2011

Jamita Minggu 4 Des 2011

PAIMAHON HALUAON SIAN DEBATA

Ev. Jes. 63:15-64:3
63:15 Sai * tatap ma sian banuaginjang, jala ida sian ingananmu na badia, jala na marmulia! Didia do nuaeng hamuruhonmu dohot hagogoonmu? Parsigorgor ni holong dohot asi ni roham? Sai mandao sian ahu.
63:16 Ai sai ho do * amanami, ai ndang ditanda ianggo si Abraham hami, jala ndang dipabotoboto si Israel hami. Ho do ale Jahowa amanami; sipalua hami do goarmu sian nahinan.
63:17 Boasa tung diloas ho hami lilu sian angka dalanmu, ale Jahowa? Boasa tung dipatangkang ho rohanami, unang huhabiari hami ho? Sai marpangulahi ma roham ala ni naposom tu angka marga ni parjambaranmu.
63:18 Satongkin sambing bangsom na badia i manean habadiaonmi, anggo nuaeng nunga diluntakluntak alonami.
63:19 Nunga hami songon halak na so dung ginomgomanmu sian na robi, na so dung marpanggoarhon goarmu.
64:1 Aut ni haru diribahi ho angka langit i jala tuat ho, asa malala angka dolok maradophon ho! Songon pangalammauashon ni api di arsam, jala panggurguri ni api di aek laho pabotohon goarmu tu angka alom, asa angka hitir angka bangso parbegu maradophon ho.
64:2 Mida halongangan angka na binahenmi, angka na so hinirimhirim ni rohanami tuat ho gabe malala angka dolok maradophon ho.
64:3 Na so dung binege ni halak sian na robi, manang tarbortik, manang diida mata adong Debata, dungkon ni ho, na mambahen halongangan tu angka na marhaposan di ibana.

Patujolo
Barita di Advent na paduahon on patuduhon hasisintong ni uhum ni Debata, jala asa marhaposan jolma i tusi, ndada tu na di tano on. Molo marhaporusan do jolma jala mambahen portibi on ojahan ni panghirimonna gabe tarhirim ma ibana. Gariada jumotjot gabe dihilala jolma naung ditadinghon Debata nasida, hape sasintongna nasida do na mandao sian Debata.
Ala ni i disosohon marhite turpuk on panopotion di dosa dohot parhurajaion laho mangido hasesaan ni dosa jala asa marpangulahi roha ni Debata mida bangso dohot huriaNa i. Dibagasan pos ni roha na songon i ma taida dumenggan sangkap ni Debata, paloas bangsoNa tarbuang di Babel alai hot do anggo uhum hatigoranNa, paluahon nasida jala mamboan nasida mulak songon bangsoNa.


Hatorangan ni Turpuk :
  • Jes. 63: 15-19 : Ditatap Debata do sian “ingananNa na badia, jala na marmulia” parniahapan ni bangsoNa di habuangan Babel, suang songon na ditatap Ibana bangsoNa i uju di tano Misir. Dihilala nasida saleleng di habuangan i, nampuna ni Debata do nasida. Bangso ni Debata do nasida, jala diingot nasida na binahen ni Debata tu ompunasida si Abraham dohot si Jakob, nang pe diparhatutu do naung dao nasida manimbil sian lomo ni roha ni Debata.
    Dipangido nasida tu Debata asa marpangulahi roha ni Debata, marningot nasida songon bangsoNa, jala sian i ma ditogu rohannasida tu inganan parsombaonnasida tu Debata i ma bagas joro i, naung diluntakluntak musunasida (ay. 18). Dibagasan parhurajaion i, sungkunsungkun rohanasida boasa paloason ni Debata nasida lilu sian angka dalanNa? Boasa tung dipatangkang Ho rohanami, unang huhabiari Ho hami? Boha do tutu, adong do sintong ni sungkunsungkun nasida i? Adong do sipangasahonon nasida di komplain nasida tu Debata? Jala molo songon i, boi do nasida – nang tu hita songon angka na porsea – mempertanggungjawabhon pangalaosionna dompak Debata? Dohononnta do i ala ni sangkap ni Debata tu nasida? Tontu, sungkunsungkun di bagasan tangiang on ndada ala dihilala nasida naung sintong nasida mangulahon parsombaon, manang mangaradoti patik ni Debata. Ninna sahalak parjamita, “Ndada ala na so diparhatutu nasida dosa nasida i tu Debata jala ala ni i do patut nasida diuhum, alai laos pangokuhonon do i paboa ala ni dosa dohot pangalaosionnasida i do gabe dipatangkang rohanasida; gabe holip marnida Debata” (Jes. 6, 9. 10; Psalm 119, 10; Rom 1, 28). Didok di Rom 1, 28, “Ala so diparhamaol nasida mananda Debata, gabe dipasahat Debata nasida tu parrohaon na so gabeak, asa diulahon uhum”. Jala di Jakobus 1, 13-14 didok do “Ai ndang masa di Debata pangunjunan tu hajahaton; ndang diunjuni Ibana manang ise. Alai dipaelaela sangkapsangkap ni rohana do ganup umbahen na tarunjun”. Dibagasan ni i tarida ma gok huaso do Tuhan Debata, gok hahomion tu nasa na tinompa, jala hubunganna tu pola kebertanggungjawaban ni jolma tu Ibana songon doktrin na maol antusan sian Bibel i. Tung gok do hikmat dohot gok hapistaran, dohot parbinotoan do Debatanta, na so hasigatan ni jolma sangkap dohot uhumna (pat. Rom 11, 33).
  • Ay. 16 : “Ho do ale Jahowa, Amanami, ..” Pandohan on patuduhon hirim ni roha ni bangso i di haluaon na sian Debata, songon ama tu anakhonna. Aha ma hirimonnasida sian Ama i? Didok di ayat 14, “Songon pinahan na tuat tu rura, ditogihonon ni Tondi ni Jahowa nasida tu hasonangan”. Bahwa songon na tinogu ni Debata angka ompunasida si Abraham dohot si Israel (Jakob), songon i ma panghirimon nasida toguon ni Debata nasida jala pasuangonna songon bangsoNa sian mulana. Diparhatopot nasida holan Debata do na boi paluahon nasida, ai si Abraham manang di Jakob ndang boi paluahon nasida. I ma dohot patuduhon pos ni roha nasida na gabe dasor panghiriman nasida di haluaonnasida.
    Laos sada credo do i di nasida, paboa Jahowa do Debatanasida , jala nasida gabe bangsona, ingkon paratarataonnasida tongtong di parningotannasida.
  • Jes. 64, 1-3 : Diparhatopot bangso i hatangkangon dohot hajahaton nasida jala ala nunga dao nasida manimbil sian lomo ni roha ni Debata na sun badia, jala ala ni dipangido nasida asa tuat Debata marhite na mangaribahi langit i songon abit, jala ro Ibana manguhum angka musu ni halak Juda, i ma bangso parbegu. Api dohot aek i ma laho manggombarhon hamamasa uhum ni Debata (isara Jer. 1, 13-14; Mal. 4, 1). Suang songon angka na dipamasa Debata angka halongangan di ayat 3, i ma marhitehite api, haholomon, dohot lalo di tingki dipasahat Ibana patik i di Dolok Sinai (2 Musa 19, 16-19; 5 Musa 4, 11-13). Ibana do Debata na sasada i, i ma Debata na sintong sian mulana, na patupa angka na masa i ditongatonga ni angka na porsea di Ibana. Jala ingkon parhatopotonnasida ma angka dosa, hagaleon dohot na so martangiang nasida dompak Ibana. Jadi ndang dohononnasida mandao Debata sian nasida, alai tung ala ni dosanasida i do mambahen holang nasida sian Debata. Ay. 3 mandok, “Na so dung binege ni halak sian na robi, manang tarbortik, manang diida mata adong Debata, dungkon ni Ho, na mambahen angka halongangan tu angka na marhaposan di Ibana”.  Disurathon Apostel Paulus do pandohan hasintongan i na sian mulana songon na di 1 Korint 2:9, disi ma sude jolma umbege sandiri hata ni Debata, jala holan marhite sian Tondi ni Debata do nasida manjalo hasisintong ni pambahenan ni Debata na gok asi ni roha, tu angka halak Juda tingki i, nang di masa ni Padan na imbaru.

Sipahusor-husoron :
  1. Masa Advent on dipatubegehon do hasintongan ni Debata marhite angka pambahenanNa dohot sude angka uhum hasintonganNa. Gabe sada kesempatan do on nang di huria di tingki on mambaritahon paboa Advent, i ma tingki panomunomuon dohot pangaradeon diri secara bersungguh-sungguh di Kristus na gabe sipalua di portibi on. Hataridaanna i ma olo hita mananda dosa dohot pangalaoisionta jala sahat tu na paubahon roha (berita pertobatan) tu adopan ni Debata, songon tangiang ni bangso i na mangido hasesaan ni dosa dohot asa marpangulahi roha ni Debata mida nasida.
  2. Hot do holong dohot asi ni rohaNa. Nang pe ingkon marungkil bangsoNa ala ni habuangan i : agoan arta, kebebasan dohot parsombaon tu Debata,dna. alai sintong do uhum ni Debata na pinamasaNa paluahonnasida. Ndang hea ibana lupa di sangkapNa asa mamboan sude na porsea di Ibana sahat tu haluaon songon na binagabagahonNa sian mulana pe (Jer. 29, 11). Haporseaon di bagabaga ni Debata mambahen nasida di bagasan hiras dohot nalom ni roha paimaima haluaon sian Debata.
  3. Mansai ringkot do pangokuhonon di huria i ala ni haunduhon tu hata ni Debata, asa sian i do tubu panghirimon taringot tu haluaon. Sude nasida martangiang marhatutuhon Jahowa do na gabe Ama di nasida sian nahinan. Pandohan on mamboan hita asa sahat tu ingatan kolektif, naung diloas Debata bangso Batak mandai haulion, hamajuon dohot hatuaon marhitehite barita na uli na sahat hita 150 taon. Nang di na tahalashon Perayaan Nasional Jubileum 150 Tahun HKBP, sada tingki laho pahusorhusor pambahen ni Debata na manogu ruas ni huria dohot angka parhaladona i di pardalanan ni tingki. Amen.

Sumber : bahan-sermon-distrik-19-jkt-2-tu-minggu-advent-ii-4-desember-2011

Tidak ada komentar:

Posting Komentar

HTML