Selamat datang di blog sederhana ini, kiranya menjadi berkat bagi kita semua

Selasa, 19 Juli 2011

Sermon Epistel Minggu 24 Juli 2011


PANGHOBASION DIBAGASAN ROHA MAULIATE
PILIPI 1:1-6
1:1 Ahu surat, tinongos ni si Paulus dohot si Timoteus, angka naposo ni Kristus Jesus, mandapothon saluhut angka na badia di bagasan Kristus Jesus, angka na di Pilippi, raphon angka sintua dohot pangurupi:
1:2 Asi ni roha ma di hamu dohot dame sian Debata Amanta dohot sian Tuhan Jesus Kristus!
1:3 Mauliate hudok tu Debatangku, ganup huingot hamu.
1:4 Tongtong manang sadihari pe hutangiangkon hamu sudena; sian las ni rohangku do huula tangiangki.
1:5 Ai huingot saormuna tu barita na uli sian mulana i sahat ro di nuaeng.
1:6 Apala on ma pos ni rohangku: Naung umpungka ulaon na denggan di bagasan hamu, patuluson ni I do i, sahat ro di ari ni Kristus Jesus.


Patujolo
Dipajongjong Ap. Paulus do Huria Pilippi rap dohot si Silas dohot si Timoteus. Tarida do na mansai denggan hubungan ni si Timoteus dohot huria on marhite haradeon nasida manarihon angka na ringkot di apostel i tingki  di Makedonia (2 Kor 11:9, Pil 4: 15-16). Surat on ditongos Apostel Paulus tingki dibagasan hurungan ibana di Rom (Ul.. 28:16-31), songon tanda hamauliateo ni rohana di sude angka na denggan na dipatupa huria Pilippi tu ibana sandiri.  Laos dipodai iaban di huria i asa tongtong dibagasan holong dahot parsaoran na denggan, dibagasan haserepon ni roha jala mardame dohot Debata.
Dibagasan turpuk on tangkas do dipatuduhon Apostel Paulus las ni rohana dohot hamauliateonna tu huria Pilippi siala sude pambahenan nasida jala dirajumi ibana do i songon asi ni roha ni Kristus.


Hatorangan
  • Tangkas do dipaboa di turpuk on, ia na manongos surat on ima si Paulus dohot si Timoteus jala mandapothon sude ruas ni huria Pilippi dohot tu angka sintua dohot pangurupi di huria i.  Digoari do nasida angka na badia dibagasan Kristus, na patuduhon nunga tung denggan huria i mardalan hombar tu lomo ni roha ni Debata jala nunga boi nasida tardok gabe sitiriuon di haporseaon.
  • Songon na somal, sai dipungka Ap. Paulus do suratna marhite hata  Asi ni roha ma di hamu dohot dame sian Debata Amanta dohot sian Tuhan Jesus Kristus! Napatuduhon holong ni rohana tu huria i, jala tangiangna do i tu Debata asa anggiat dilehon Debata tu nasida asi ni roha dohot dame  marhite-hite Tuhan Jesus Kristus ulu ni huria i.
  • Didok Ap. Paulus do muse hata Mauliate tu Debata ala marningot huria i. Mandok mauliate ima sada hasomalan ni Ap. Paulus. Di 1 Kor 1:4 didok :”Mandok mauliate do ahu tongtong di Debatangku siala hamu, marningot asi ni roha ni Debata, naung nilehonna tu hamu di bagasan Kristus Jesus”. Dohot di Ep. 1:16 didok : “ndang mansadi ahu mandok mauliate siala hamu, marningot hamu, di na martangiang ahu”.  Marlas ni roha do Ap. Paulus ala lam martamba-tamba do parbue ni panghobasionna di huria Pilippi. Tarida ma i sian ngolu parsaoran ni huria in a sai dibagasan holong, hasadaon dohot haporseaon na togu. Tung pe dang rap be nasida dohot Ap. Paulus hatiha i alani panghobasionna di huria na asing, alai sai tongtong do ditangiangkon Ap. Paulus nasida songon na taida di turpuk on. Ndang mansadi ibana managiangkon huria Pilippi on, ai molo diingot ibana huria Pilippi gabe marningot ma ibana di angka na denggan na di huria in a mambahen las ni rohana.  Dibagasan hurungan pe Ap. Paulus, sai diingot jala ditangiangkon ibana do huria i asa lam denggan jala asa tulus sude angka ulaon na denggan manghorhon hadameaon di huria i
  • Nang pe di hurungan Ap. Paulus, alai tong do ibana marbarita nauli. Marhite na tarihot ibana di hurungan i, dipangke Debata do Ap. Paulus laho paluahon angka na tarihot Ngolu ni Ap. Paulus ima ngolu na optimis ndang pesimis, ngolu na bersemangat ndang mandele, ngolu na marpanghirimon ndang putus asa. Dihaporseai ibana do Tondi Parbadia na mangula mangurupi huriaNa laho patupahon angka ulaon na denggan hombar tu lomo ni roha ni Debata.  Dihaporseai Ap. Paulus do hata ni Tuhan jesus na mandok :”Ai ida ma, sai na dongananku do hamu ganup ari, rasirasa ro ajal ni hasiangan on! (Mat. 28:20). On ma na gabe motivasi di ibana laho mangadopi angka hamaolon dohot parsorion na masa di pardalanan ni panghobasionna. Diparhatopot ibana do ia ulaon parbarita nauli ima ulaon ni Debata, alani didia pe barita nauli di baritahon adong do huaso ni Debata na mangula disi.

Sipahusor-husoron
  • Sitiruon do ngolu panghobasion ni Ap. Paulus na tongtong dibagasan hiras ni roha dohot semangat, jala tongtong dibagasan roha mauliate mangulahon tohonanna tung pe godang angka na masa diadopi ibana
  • Ndang mansadi Ap. Paulus martangiang tu Debata mangido pasu-pasu dohot pandonganion ni Jahowa dibagasan pardalanan ni ngoluna. Tarlumobi dibagasan ulaon panghobasionna songot sahalak apostel laho maritahin barita nauli. Marhite tangiangna gabe margogo ibana jalan ndang adong biar ni rohana mangadopi angka hamaolon dohot tantangan na masa tu ibana
  • Tongtong do mangula Kristus dibagasan huriaNa i, alani songon angka pangula ni Debata, tarjou do hita laho mamritahon barita na uli ni Kristus i marhite Panindangion, Parsaoran dohot Panghobasion na tama di huria i, ima Tri Tugas Gereja Marturia, Koinonia dohot Diakonia. AMEN

Tidak ada komentar:

Poskan Komentar

HTML