Selamat datang di blog sederhana ini, kiranya menjadi berkat bagi kita semua

Kamis, 19 Mei 2011

SERMON JAMITA MINGGU 22 MEI 2011

MARPARBUE dohot MARHAPORSEAON
Mat. 21 : 14-22
21:14 Dung i didapothon angka na mapitung dohot na lumpuon ma Ibana tu bagas joro i, jadi dipamalum ma nasida.
21:15 Alai sogo situtu ma angka sintua ni malim dohot sibotosurat marnida halongangan na pinambahenna i, nang umbege dakdanak angka na manjoujou di bagas joro: Hosianna di Anak ni raja Daud!
21:16 Laos didok ma tu Ibana: Dibege Ho do hatanasida on? Jadi didok Jesus ma tu nasida: Hubege do! Ndang dung dijaha hamu huroha: "Soara ni angka dakdanak dohot posoposo dipature Ho gabe pujipujian"?
21:17 Dung i ditadingkon ma nasida, ruar ma Ibana sian huta i dompak Betania, laos disi ma marborngin.
21:18 Alai torang ni arina i, laho mulak tu huta i, male ma dihilala.
21:19 Dung i diida ma di dalan i hau ara sangkambona jadi didapothon ma, hape holan bulung sambing do jumpangsa disi, gabe didok ma tu hau i: Na so jadi be ho marparbue olat ni on! Jadi pintor rahar ma hau ara i.
21:20 Marnida i angka sisean i, tarhalomong ma rohanasida, angka ninna ma: Ndi, tompuna i rahar hau ara i!
21:21 Jadi dialusi Jesus ma nasida: Na tutu do na hudok on tu hamu: Aut na porsea hamu, so ganggu rohamu, ndada holan songon na tu hau ara ondeng patupaonmuna. Sandok gari tu dolok an dohononmuna: Munsat ma ho jala madabu tu laut, gari saut do!
21:22 Ai jaloonmuna do saluhut nasa na pinangidomuna di tangiangmuna, anggo na porsea hamu!

Patujolo

Dijolo ni turpuk on (ay. 1-11) ima haroro ni Jesus tu huta Jerusalem. Asa jumpang ma na nidok ni Panurirang Sakaria : “Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina” (Sak. 9:9).

Di na bongot Ibana tu Jerusalem, mansai torop halak manomu-nomu haroroNa marhite na mangolophon : “Hosianna di Anak ni raja Daud! Pinasupasu ma na ro marhitehite Goar ni Tuhan i! Hosianna ma di ginjang!”. Dipahembang angka natorop i do angka ulosna tu dalan i dohot angka mare-mare laho manomu-nomu Ibana.
Alani gabe sogo ma roha ni angka Parise dohot angka siboto surat i, jala didok ma tu Jesus :”Orai ma antong angka siseanmi, Guru!”, alai dialusi Jesus ma “Hudok ma di hamu: Aut mauhom nasida, joujou ma angka batu!”. (Luk. 19:39-40).
Dung sahat Jesus di huta Jerusalem, pintor bongot ma Ibana tu bagas joro (Sinagoge), alai dibereng ma disi torop halak martiga-tiga, situngkari hepeng dohot angka sigadis darapati. Marnida i, muruk ma Jesus laos di patunggalinghon ma angka meja ni partiga-tiga i   jala dipabali (dipalao) ma nasida sian alaman ni Bagas joro i. Laos didok Jesus ma tu nasida: "Bagas partangiangan do goar ni bagashu, alai gabe liang ni pandobo do i dibahen hamu! (ay. 12-13).
Marnida saluhut na i, lam sogo ma roha ni angka sintua ni malim dohot angka sibotosurat maradophon Jesus, ai sasintongna na satolop do nasida dohot angka partiga-tiga i patupahon songon i di Bagas joro i, tarlumobi di tingki ari pesta.

Hatorangan ni turpuk

 Adong tolu bagian na tabereng di turpuk on ima :

-       Ay. 14-16, Bongot Jesus tu bagas joro pamalumhon na mapitung dohot na lumpuh.
Dung dipabali Jesus angka partiga-tiga i, bongot ma Ibana tu bagas joro,laos diihuthon angka natorop i ma Ibana, angka na mapitung, na lumpuh dohot angka dakdanak na manjouhon “Hosianna di anak ni raja Daud”. Laos dipamalum Jesus do na mapitung dohot na lumpu on i dibagas joro i. Sogo ma roha ni angka sintua ni malim mamereng na masa i, gabe didok nasida : “Dibege Ho do hatanasida on? Jadi didok Jesus ma tu nasida: “Hubege do! Ndang dung dijaha hamu huroha : Soara ni angka dakdanak dohot posoposo dipature Ho gabe pujipujian"?.
-       Ay 19-20, Di uhum Jesus hau ara
Dung ruar Ibana sian bagas joro, laho ma nasida (Jesus & SiseanNa) tu huta Betania, laos disi ma nasida marborngin. Manogotna i, marsangkap ma nasida muse laho tu Jerusalem, alai di dalan i dope nunga male nasida,  dapot nasida ma sada hau ara disi, alai ndang adong parbuena. Gabe diuhum Tuhan Jesus ma hau ara i, laos rahar ma.
Di tingki i molo dipardalanan halak, sai dilului do parbue ni hau na boi sipanganon, isara ni parbue ni hau anggur, dalimo manang hau ara, na boi sipanganon molo male dipardalanan.
Uhuman ni Tuhan Jesus tu hau ara i marpardomuan do i tu hataNa na mandok :”Nasa hau na so marparbuehon na denggan, sitabaon do, gabe bolong nama tu api”. (Mat. 7: 19)
-       Ay. 21-22, Taringot tu huaso ni haporseaon
Tarhalomong do angka sisean i dung dibereng nasida rahar hau ara i, alai laos tingki i do dipangke Tuhan Jesus mangajari nasida taringot tu huaso ni haporseaon, ido umbahen didok “Aut na porsea hamu, so ganggu rohamu, ndada holan songon na tu hau ara ondeng patupaonmuna. Sandok gari tu dolok an dohononmuna: Munsat ma ho jala madabu tu laut, gari saut do!  Ai jaloonmuna do saluhut nasa na pinangidomuna di tangiangmuna, anggo na porsea hamu”. Sadalan do i tu na nidok ni Tuhan Jesus di Luk. 17:6 :”Molo adong di hamu haporseaon na sabatu ni siarum, tardok hamu do tu hau galagala an: Maborgat ma ho suanhon ma ho tu laut!, gabe oloanna do hamu”.
Diajari Tuhan Jesus do nasida hinabalga ni huaso ni halak na porsea, alani do didok Tuhan Jesus tu angka na marsahit dohot na mapitung na pinamalumNa i : “Marguru tu haporseaonmuna ma jumpang hamu”, dohot tu parompuan pardosa na mamiahi Ibana dibagas ni sahalak Parise “Haporseaonmi do paluahon ho. Mardame ma ho muli!”.

 Sipahusor-husor on

1.    Bagas joro ima inganan na badia, inganan partangiangan, inganan mangalap bohal ni ngolu partondion, inganan ni Debata pamalumhon angka sahit pardagingon dohot partondion, dohot mangungkap mata na mapitung / na so marnida pambahenan ni Debata dibagasan ngoluna. Bagas joro ima inganan parsaoran na so mamereng tirket-tirket ni ngolu, na mora, na pogos, na hipas, na marsahit, baoa, boru-boru, na magodang manang dakdanak, saluhutna i dos diadopan ni Debata. Bagas joro ima inganan pamujion tu Debata, sude do halak ingkon mamuji Debata, na magodang manang dakdanak, alani molo gaor pe soara ni dakdanak di bagas joro boi do i dipature gabe pamujion di Jahowa. I do didok Tuhan Jesus :”Soara ni angka dakdanak dohot posoposo dipature gabe pujipujian”.
Saluhutna i boi dapot hita marhite parsaoran na badia di bagas joro i. Ingkon badia do bagas joro i, marhite i gabe diparbadia i ma pangalaho dohot pambahenan ni angka halak na bongot tusi.
Alani, Bagas joro unang ma gabe inganan pandoboan, korupsi, konspirasi dohot angka ulaon na rumar.
2.    Hau ara na so marparbue, gombaran do i tu ngolu ni halak Kristen naung pinillit ni Debata. Didok Tuhanta : “Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu.” (Joh. 15:16). Ngolu ni halak Kristen na sintong ima ngolu na marparbuehon na denggan tu na humaliangna. Angka parbue i ma : na masihaholongan, hamubaon ni roha, habengeton, hatigoran, dna. Ai sian angka parbue i do tandaon hita songon halak Kristen si ihuthon Kristus..
3.  Marhuaso do halak na porsea i patupahon angka halongangan, tung mansai godang do huaso hinorhon ni haporseaon. Sian dia do ro haporseaon i? ima sian na tumangihon hata ni Kristus do (Rom. 10:17). Antong songon halak naung jotjot tumangihon hata ni Debata marhite angka naposoNa, ingkon gabe halak na porsea ma hita dibagasan Tondi ni Debata. Ai Parbue ni Tondi do haporseaon i (Gal. 5:22).
Haporseaon ima pos ni roha di angka sihirimon, jala pamotoan na tontu taringot tu na so niida (Heb 11:1).
Hinorhon ni haporseaon do hita boi mangadopi angka parungkilon di bagasan ngolu on dohot patupahon angka ulaon denggan tu angka dongan,
Hinorhon ni Haporseaon do hita boi manjalo saluhut na tapangido tu Tuhanta marhite tangiangta.
Alai ingkon sarombang do haporseaon i dohot pangulaon asa mapangkorhon. Asa i do didok Jak. 2:17 “Haporseaon i pe songon i do: Anggo so adong pangulaonna, naung mate do hadirionna”
Antong tahangoluhon ma haporseaonta i marhite pangualonta na denggan na hombar tu lomo ni roha ni Tuhanta Jesus Kristus, ai Ibana do do induk ni haporseaon i jala na paujungkonsa, i ma Jesus, na manaonhon parsilangon i, singkat ni las ni roha, tohapna i hian, so dietong i hailaon, gabe hundul di siamun ni habangsa ni Debata! (Heb. 12:2). AMEN

Tidak ada komentar:

Poskan Komentar

HTML