Sermon Epistel Minggu 29 Mei 2011

TAPUJI JALA TASOMBA MA JAHOWA MARHITE ENDE DOHOT TANGIANGTA

Ep. Psalm 95 : 1-7

95:1 Beta hamu itaendehon ma Jahowa, itaolophon ma * partanobatoan ni hatuaonta!

95:2 Itadapothon ma tu jolo ni bohina marhitehite pujipujian, itaolophon ma Ibana marhitehite ende!

95:3 Ai Debata na timbul do Jahowa, jala raja bolon mangatasi sude angka debata.

95:4 Di bagasan tanganna do angka ojahan ni tano on, jala guru di Ibana do punsu ni angka dolok.

95:5 Guru di Ibana do laut, jala Ibana do tumompasa, jala tanganna do jumadihon tano darat.

95:6 Beta hita manungkap dohot marsomba, marsinggang ma hita tu jolo ni Jahowa, Sitompa hita.

95:7 Ai * Ibana do Debatanta, jala hita bangso pinarmahanna, jala birubiru ni tanganna. * Sadarion, aut ditangihon hamu nian soarana!

Patujolo

Molo tapamanat turpuk on, ima panogihonon ni par-psalmen do i tu hita laho patupahon pamujion na tama tu adopan ni Tuhanta. Dipaandar do tu hita, boha paujion na tama di adopan ni Debata.

• Ay. 1-2, Ditogihon do hita marhite hata “Beta hamu..”, na marlapatan rap ma hita (berjamaah) laho  mamuji Debata, mangolophon Ibana marhite puji-pujian dohot ende.. 
• Ay. 3-5, Boasa ingkon pujion Debata? Ima ala Debata do partanobatoanta, Raja na Tumimbul, na mangatasi sude angka Debata ni portibion, si tompa langit dohot tano ro di sude pangisina.
• Ay. 6, Ima paingothon hita, ia pamujion tu Debata ingkon dibagasan haserepon ni roha. Mamuji Debata dibagasan serep ni roha dipatuduhon marhite sikap na unduk, manungkap, marsomba dohot marsinggang di adopanNa i..
• Ay. 7, Dibagasan pamujion i ingkon tarantusi do songon dia ma parsaoranta dohot Debata,  Debata i do Parmahan, hita biru-biruNa, alani songon biru-biru hita, ingkon tatangihon  ma soaraNa, asa unang lilu hita.

Hatorangan
Dipangke par-Psalmen on do angka hata na ganjang jala marulak-ulak laho manogihon jolma i asa ro marsomba tu adopan ni Jahowa laho  mamuji dohot pasangaphon Ibana. Adong dua na tabereng di turpukon rumang ni pamujion ima Pamujion dohot Parsombaon marhite Ende dohot Tangiang.

1. Pamujion marhite ende puji-pujian. Di paandar do tu hita, ia pamujion tu Debata ingkon mardongan olop-olop dohot las ni roha. Boha do hita nuaeng, tingki mamuji Debata hita, nunga mardongan olop-olop hita mamuji Debata, manang holan alani hasomalan sambing, manang holan na nionjar ni tabo ni music do, dna? Na ni dok ni par-Psalmen on unang ma holan las ni roha parduru sambing na ta patuduhon tingki mamuji Debata,  Boi do halak marsurak-surak tingki marende dibagasan angka kebaktian, alai rohana ndang marlas ni roha, gabe las ni roha na semu do na dapotna disi. Alai las ni roha dohot olop-olop na tingkos ima mamuji Debata dibagasan roha na marolop-olop, ala mangarajumi angka pambahenan ni Jahowa dibagasan ngolunta.
2. Di ay. 6, dipatangkas do tu hita rumang ni pamujion na paduahon, ima marhite na manungkap, marsomba dohot marsinggang. Sikap na songon on ima sikap ni halak na martangiang. Tangiang ndang holan dalan mangido sipangidooan tu Debata, alai ingkon parjolo do pasahathon Pamujion dohot Parsombaonta tu Ibana.

Parsombaon  ima puncak ni pamujion. Halak na marsomba ima na patuduhon naung manghilala pambahenan ni Debata di bagasan ngoluna marhite huasoNa dohot halonganan abgka na binahenNa i. Marsomba ingkon dibagasan haserepon ni roha, alani do didok “Beta hita manungkap dohot marsomba, marsinggang ma hita tu jolo ni Jahowa….”. Halak na marsomba ingkon mangarajumi dirina ditoru ni huaso ni na sinombana, ndang sabalikna. Ditoru huaso ni Debata do hita, ai Ibana do sitompa hita, alani ingkon serep ma rohanta matsomba tu adopanNa na badia i.

Pamujion dohot Parsombaon marhite Ende dohot Tangiang, sada do tujuanna ima dalan pasangaphon Jahowa. Songon na didiok di Psalm. 100:4 “Bongot i hamu ma angka bahalNa marhitehite hamauliateon, angka alamanNa marhitehite pujipujian, mauliate ma rohamuna tu Ibana, puji hamu ma goarNa”.

Panimpuli

• Tapuji jala tasomba ma Debata marhite-hite angka ende puji-pujian dohot dibagasan tangiangta, mardongann las ni roha dohot olop-olop dohot  dibagasan haserepon ni roha, ai Ibana do Debatanta sitompa hita. 
• Alai, Pamujion dohot Parsombaon tu Debata unang ma holan marhite surak-surak manang soara ni angka ende, alai ingkon tarida ma i tongtong marhite pambahenan dohot angka pangalahonta di bagasan ngolu siaganup ari. AMEN