PARMAHAN NA DENGGAN
Evangelium: Yehezkiel 34:11-19
34:11 Ai songon on do hata ni Tuhan Jahowa: Ida ma, ahu, apala ahu sandiri usouso sogot di birubirungku, jala luluanku nasida.
34:12 * Songon pangalului ni parmahan di punguanna di ari uju di tongatonga ni birubirunna angka na mampar i ibana, suang songon i ahu mangalului birubirungku sogot, jala paluaonku nasida sian saluhut inganan parserahannasida i, * uju di ari ombun dohot haholomon marimpotimpot.
34:13 Jala ahu manogihon nasida ruar sian angka bangso dohot papunguhon nasida sian angka luat, asa huboan nasida mulak tu tanonasida i, laos ahu marmahan nasida di atas ni angka dolok Israel, di bagasan angka rura dohot di bagasan saluhut parmianan di tano on.
34:14 Di * jampalan apala na lomak ahu marmahan nasida, jala di atas dolok angka na timbo di Israel parudamannasida, disi ma mangulon nasida di parudaman na denggan, jala jampalan apala na lomak jampalanna di atas ni angka dolok ni Israel.
34:15 Ahu sandiri ma marmahan birubirungku, jala ahu paulon nasida, ninna Tuhan Jahowa.
34:16 Luluanku ma na mago i, jala mulak boanonku na tardempar i, jala lilitanku do na mabugang i, jala pargogoanku do na marsahit i; alai anggo na mokmok i dohot na gogo i siaphononku do, ahu sandiri tahe marmahansa marhitehite uhum.
34:17 Alai anggo tu hamu ale birubirungku songon on do hata ni Tuhan Jahowa: Ida ma, ahu ma manguhum * di holangholang ni birubiru martimbangkon birubiru, tole birubiru tunggal martimbangkon hambing tunggal.
34:18 Maotikku dope huroha di rohamu naung jinampalmuna i jampalan na lomak i, dohot do ebaeba ni jampalanmuna i, ingkon popoanmuna marhitehite patmuna, jala aek na tio diinum hamu, alai anggo ebaebana i dilitohi hamu do marhitehite patmuna.
34:19 Tung patut ma birubirungku manjampal na pinopoan ni patmuna i, jala inumonna na nilitohan ni patmuna i?
Hatorangan
Molo tataringoti Parmahan, tontu sahali adong ma na pinarmahanna. Ulaon ni Parmahan ima mangaradoti angka na pinarmahanna asa unang mago, unang marserak, jala dapotan jampalan na lomak. Boi do ra tapatudos parmahan dohot uluan di sada inganan, isarani uluan ni Negara manang huria. Taringot tusi do nanaeng dipatuduhon turpuk on tu hita, uluan na digoari parmahan dohot rakyat/ruas na digoari biru-biru. Mansai tangkas do na nidok ni panurirang Hesekiel on tarida di ngolunta siap ari.
Debata do na pasahathon nagka biru-biruNa i asa diparmahani. Alai adong do parmahan i na so mangaradoti angka biru-biruna. Adong na marsahit alai ndang diubati, adong na mago alai ndang dilului, na marserak ndang dipapungu, na mauas male dang diboan tu aek nation dohot jampalan na lomak. Ima angka parmahan na so mangulahon ulaonna dohot denggan, gabe dibuat nampuna biri-biru i ma angka biru-biruNa. Asa gabe didok : “Ida ma, ahu, apala ahu sandiri usouso sogot di birubirungku, jala luluanku nasida…., Luluanku ma na mago i, jala mulak boanonku na tardempar i, jala lilitanku do na mabugang i, jala pargogoanku do na marsahit i; alai anggo na mokmok i dohot na gogo i siaphononku do, ahu sandiri tahe marmahansa marhitehite uhum”.
Tung mansai marsak do Debata alani angka jolma naung dipillitNa gabe uluan manang parmahan. Alani aha?
Parmahan ima naung dilehon tugas dohot tanggung laho manguluhon angka ruasna. Dibagasan jaman si nuaeng on, godang do Negara/wilayah/instansi/lembaga/gereja na niuluhon ni sasahalak asa denggan mardalan angka ulaon dohot parngoluon ni angka na niuluhonna. Alai molo tabereng aha do na masa, tung mansai godang do uluan na so mangula hombar tu tugas dohot tanggung jawabna, adong ma on na terlibat korupsi, kesewenang-wenangan, mementingkan diri sendiri dohot kelompokna. Ndang dipardulihon be angka rakyat/ruas na niuluhonna. Hapogoson lam martamba, parsahiton lam godang, kejahatan merajalela, dna. Ndang adong be sihirimon sian parmahan na di portibion. Alani do masihol jolma i di figure parmahan na denggan, na boi mamboan jolma i tu kesejahteraan (pemerintah) dohot mamboan jolma i tu hadameon dohot panghiriomon partondion (gereja)..
Alai di pihak lain adong do angka biru-biru i na “menjilat” asa dilehon parmahan di nasida “keistimewaan” sian na asing. Gabe masa ma kolusi dohot koalisi tu na so denggan.
Tu angka biru-biru na songon i, ingkon Debata sandiri ma na marmahani. Jala unsatonNa ma tohonan sian parmahan i. Ai sian Debata do ro tohonan i. Alani ingkon dirajumi sude uluan do, na sian Debata do haroroan ni saluhut huaso na adong di Ibana.
Gok holong ni roha ni Debata do portibion, alai molo dang dihangoluhon jolma holong i, gabe rimas ma Debata. UhumonNa ma nasida hombar tu na niulana, gabe Panguhum ma Jahowa di tonga-tonga nasida. Alai tu angka na manghaholongi Ibana, hot do asi ni rohaNa, asa didok : “Luluanku ma na mago i, jala mulak boanonku na tardempar i, jala lilitanku do na mabugang i, jala pargogoanku do na marsahit i; alai anggo na mokmok i dohot na gogo i siaphononku do, ahu sandiri tahe marmahansa marhitehite uhum”. Na mokmok dohot na gogo marlapatan angka na sukses alani kolusi, korupsi dohot dohot koalisi na mementingkan diri dohot kelompok, Debata ma marmahan nasida dibagasan uhum (Pengadilan).
Panimpuli
- Asa saluhut uluan di bangso manang huria pe, ingot be ma na sian Debata do jabatan/pangkat/tohonan in a mangalehon mandat, alani ingkon dipertanggung jawabkan do i tu mandataris ima Jahowa Debata.
- Adong do sitiruon songon parmahan na denggan, ima Kristus Jesus na olo mate tarsilang humophop biru-biruNa. Alani songon tanda manghaholongi Debata parmahani angka biru-biru na dipasahat tu hita. Songon na nidok ni Tuhan Jesus tu si Petrus : “Parmahan i ma angka birubirungku!”
- Antong hita pe, angka biru-biru ni Debata, taoloi ma Parmahan na denggan i, unang hita manimbil sian dalanNa, tangihon ma panjouonNa, bege ma hataNa, ihuthon ma Ibana, asa dapot hita hangoluan di portibion dohot hangoluon sogot na hot ro di saleleng nilelengna. AMEN
Tidak ada komentar:
Posting Komentar
HTML