JAMITA MINGGU ROGATE 29 MEI 2011

AJARI HAMI MARTANGIANG

Ev. Lukas 11 : 1-8

11:1 Uju martangiang Ibana di sada inganan, jala dung mansohot, ninna sahalak siseanna ma mandok Ibana: Tuhan, ajari hami martangiang, songon na binahen ni si Johannes tu angka siseanna.

11:2 Gabe didok ma tu nasida: Songon on ma dok hamu laho martangiang: Ale Amanami, sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on, songon na di banua ginjang!

11:3 Lehon ma tu hami sadari on hangoluan siap ari!

11:4 Sesa ma dosanami, songon panesanami di dosa ni nasa na mardosa tu hami; jala unang hami togihon tu pangunjunan! Palua ma hami sian pangago!

11:5 Laos ninna ma mandok nasida: Ise hamu na maraleale, gabe ditopot ma i mareak tongaborngin, mandok tu ibana: Ua, pasali ahu tolu roti!

11:6 Ai ro do alealengku sian pardalananna, jala ndang adong sipanganon lehononku tu ibana.

11:7 Gabe dialusi halak i ma sian bagasan, mandok: Unang ahu susai! Nunga sordak pintu, jala nunga modom angka anakkonku rap dohot ahu; ndang tarbahen ahu hehe mangalehon di ho.

11:8 Hudok ma di hamu: Nang so hehe halak i mangalehon, ala naung maraleale nasida, ndang tarbahensa so hehe mangalehon nasa na ringkot di ibana ala ni jugulna i mangido.

Patujolo

Tangiang Ale Amanami ima tangiang hatopan ni halak Kristen. Tangiang on diajarhon Tuhan Jesus do tu angka siseanNa gabe sada tangiang hatopan na niihuthon ni sude halak Kristen di sandok portibi on.

Molo tapamanat di Evangelium Mateus (6:9-13), disurathon do tangiang on songon bagian ni Jamita di dolok. Laos i do na tabereng di turpuk on ima Evangelium ni si Lukas (11:2-4).

Di turpuk on ndang adong taida disurathon Doksologi (Ai Ho do nampuna harajaon dohot hagogoon dohot hasangapon ro di saleleng ni lelengna) songon na di Evangelium Mateus i. Disura roha do ia Doksologi on na ditambai nama i songon bagian ni Liturgi ni Huria na parjolo i. Alani do di angka terjemahan na asing gabe bagian tersendiri do doksologi on. Di Agenda HKBP, ditingki tangiang panutup ni Parmingguon, diendehon do doksologi on: “Ai Ho do nampuna harajaon dohot hagogoon dohot hasangapon ro di saleleng ni lelengna..Amen!).

Hatorangan

-       Ajari hami martangiang

Lapatan ni Tangiang ima manghatai dohot Debata, pasahathon puji-pujian dohot pangidoan tu Debata, dibagasan panghirimon anggiat ditangihon jala dialusi Debata tangiangta i. Dibasa-basahon Debata do tu hita ragam ni angka silehon-lehon dohot talenta ganup marsada-sada, alai tangiang ima silehon-lehon na boi dipangke saluhut halak.

Jot-jot dope ndang taantusi boha do martangiang na sintong hombar tu lomo ni roha ni Debata. Alani do ringkot hita marsiajar martangiang, songon angka sisean i na mangido tu Tuhan Jesus asa diajari nasida martangiang.

Tangiang Ale Amanami ndang tangiang ni Tuhan Jesus, alai tangiang naniajarhonNa do i tu hita asa taantusi boha do martangiang na tingkos.

-       Songon dia sikap ni rohanta molo martangiang?

• Molo martangiang, unang ma songon halak pangansi (munafik), angka na mangkalomohon jongjong martangiang di angka parguruan dohot di dalan balobung, asa diida jolma i nasida. (Mat. 6:5; Luk. 18:10-14))
• Molo martangiang, tu bilut ma ho laho; sordak ma pintu i! Dung i martangiang ma ho tu Amangmu na di na buni, gabe baloson ni Amangmu, na marnida di na buni, ma i tu ho! (Mat. 6 :6)
• Molo martangiang, unang marnoninoni (bertele-tele) bahen hamu songon binahen ni sipelebegu. (Mat. 6:7)
• Molo martangiang, ingkon tarajumi do dibagasan haporseaonta naung parjolo do diboto Debata do na ringkot di ngolunta, andorang so mangido dope hita.

-       Songon dia ma tangiang na niajarhon ni Tuhan Jesus?.

Diajarhon Tuhan Jesus do hita martangiang secara sistematis, ndang tangiang na marulak-ulak. Tapamanat ma jolo sada-sada hombar tu Katekhismus na pinatupa ni Marthin Luther :

1. Ale Amanami na di banuaginjang!, Apoapo ni Debata do i tu hita paboa Amanta situtu Ibana jala anakNa situtu hita, asa pos rohanta mangido tu Ibana songon pos ni roha ni dakdanak na mangido tu amana.
2. Sai pinarbadia ma goarMu!, Na badia hian do goar ni Debata, alai naeng ma badia goar ni Debata idaon ni rohanta, i do na tapangido disi.
3. Sai ro ma harajaonMu!, Ia Harajaon ni Debata, sai na ro do i nang so itapangido, alai asa haru sahat ro tu hita on, i do na itapangido disi.
4. Sai saut ma lomo ni rohaM di banuatonga on songon na di banuaginjang!,  Ia roha ni Debata na denggan jala na marasi i, na saut hian do nang so itapangido, alai asa tung saut rohaNa di hita on, i do na itapangido disi.
5. Lehon ma tu hami hangoluan siapari!,:  Dilehon Debata do nian hangoluan siapari dohot tu halak angka na jahat i, nang so itapangido alai asa dipaingot Debata hita marhatopothon asi ni rohaNa, asa mandok mauliate hita tu Ibana di na manjalo hangoluan siapari i hita sian Ibana.  I do na itapangido disi. Angka aha ma hangoluan siapari i? Ima : Sipanganon, siinumon, parabiton, arta, bagas, dongan saripe na burju dohot ianakhon na burju, ro di angka naposo ro di raja na tigor roha,  uhum na sintong, ari na hasea dohot dame,  hisar ni daging, sangap, aleale na denggan roha, dohot dongan sahuta na ture, ro di nasa na hasea di hajolmaon.
6. Sesa dosanami songon panesanami di dosa ni dongan na mardosa tu hami., Itapangido asi ni roha ni Amanta na di banuaginjang i, asa anggiat unang dijujur dosanta, jala asa anggiat unang biasan rohaNa ala dosanta i, mangoloi na itapangido sian Ibana. Ai apala tama lehononNa nian tu hita na itapangido dibahen na so ture i parangenta i, ai lan do dosanta ganup ari, sipinsangon do hita nian, i do na tama, alai sai asi ma rohaNa dilehon ma tu hita na itapangido, ai hita pe, na olo do hita dohot nasa rohanta manesa dosa ni angka na mardosa tu hita dohot sumuan uhum na denggan tu nasida.
7. Unang hami togihon tu pangunjunan, Ia Debata ndang adong manang ise nian diunjuni, alai asa sai diramoti Debata hita, asa unang diansi sibolis i manang hajolmaon, manang roha ni dagingta i hita, jala asa unang olo hita manopot pandelean manang haurahon dohot hajahaton na asing, dung i molo tung adong sisongon i ro tu hita asa ditumpak hita monang. I do na itapangido disi.
8. Palua ma hami sian pangago, Itapangido sian Debata hadadao ni nasa hamagoan ni daging dohot tondi  dohot pansamotan dohot hasangaphon; angkup ni i itapangido sian Debata, hasonangan lehononNa tu hita di hasusuda ni bohalta; sai asi ma rohaNa, diboan ma hita sian rura hasusaan on tu banuaginjang tu lambungna. I do na itapangido disi.
9. Doksologi : Ai Ho do nampuna Harajaon dohot hagogoon ro di hasangaphon saleleng ni lelengna. Amen,

-       Jugulhon hamu martangiang

Di ay. 5-8, ditaringoti Jesus do disi taringot tu halak na marale-ale, na ro sahalak manopot ale-alena di tonga borngin mangido pangurupion. Didok Jesus, molo tung pe naung sordak pintu dohot naung modom ale-alena i, alai molo dijugulhon mangido, nda patut do lehononna?

Digombarhon i do boha hita mangido tu Debata dibagasan tangiangta, ingkon adong do di hita roha na manontong, unang mura putus asa, Di Rom 12:12  didok “Marlas ni roha ma hamu mangkirim! Marbenget ni roha ma di haporsuhon! Jugulhon hamu ma tangiang!”. AMEN!

Note :
Angka ayat sipahusor-husoron taringot tu Partangiangon?

• Mat. 26:41 Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging
• Jes. 59:2 Angka hajahatonmuna tahe sumirang hamu sian Debatamuna, jala angka dosamuna mangondingi bohina maradophon hamu, umbahen so ditangihon ibana hamu.
• Psalm. 66:18 Tung sura hajahaton ditahi rohangku, ndang tagamon tangihonon ni Tuhan i ahu
• Poda 15:8 Marbiasbias do roha ni Jahowa mida pelean ni halak parjahat, alai anggo tangiang ni halak partigor lomo ni rohana do i.
• Mat. 5:23-24 Asa molo diboan ho sipelehononmu tu langgatan, dung i tarsingot roham disi di sogo ni roha ni donganmu dompak ho, tadingkon ma sipelehononmi di jolo ni langgatan i; laho ma ho jolo mardenggan dohot donganmi; dung pe i, asa ro ho pasahathon sipelehononmi.
• Mark. 11:25 Alai molo jongjong hamu martangiang, sai sesa hamu ma, molo adong pangkurangi ni rohamu di halak, anggiat disesa nang Amamuna na di banua ginjang i salamuna.
• Jak. 1:6-7 Alai di bagasan haporseaon ma ibana mangido, unang marganggu ni roha; ai na ganggu roha i, tudos do tu galumbang ni laut, na pinahuturhutur jala na pinalindaklindak ni alogo. Unang ma diparbaga roha ni halak i, jaloonna agia aha sian Tuhan i.
• Mark 11:24 Dibahen i hudok ma tu hamu: Saluhutna, manang dia pe dipangido hamu di tangiangmuna, sai na sahat do i tu hamu, asal porsea hamu, ingkon jaloonmuna 
• Luk 11:9-10 Ahu pe, hudok ma tu hamu: Pangido hamu ma, sai na lehonon do tu hamu; lului hamu ma, sai na jumpangan do hamu; tuktuhi hamu ma, sai na ungkapon do di hamu! Ai sai na manjalo do nasa na mangido; sai na jumpangan do na mangalului jala sai na ungkapon do di na manuktuhi.
• 1 Pet 3:7 Angka baoa pe songon i ma; marroha ma hamu mangangkupi nasida, ala pardaging na gumale do ina i. Sangap ma bahen hamu nasida, ala dohot do nasida dongan panean di asiasi hangoluan, asa unang tarambat tangiangmuna.
• Joh. 14:13-14 Asa manang aha pangidoanmuna marhitehite Goarhu, patupaonku do, asa marsangap Ama i di bagasan Anak i! Molo dipangido hamu manang aha sian Ahu marhitehite Goarhu, patupaonku ma.
• Joh. 15:7 Molo mian hamu di bagasan Ahu, jala molo mian hatangki di bagasan hamu, jumpang hamu do manang dia pe dipangido rohamuna.
• Poda 28:9 Manang ise na padao pinggolna unang tangitangionna uhum, tangiangna pe antong gabe biasbias do.
• Jak 5:16 Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon.
• Psalm 102:18 Naung marpangulahi rohana mida tangiang ni na so mardihadiha, jala * ndang lea rohana di tangiangnasida.
• Pil 4:6 Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan.
• Kol 4:2 Manongtong ma hamu martangiang; dungo ma hamu disi, huhut mandok mauliateBertekunlah dalam doa dan dalam pada itu berjaga-jagalah sambil mengucap syukur.
• Epesus 6:18 Martangiang ma hamu, mardongan sandok pangidoan dohot elehelek di bagasan Tondi, manang sadihari pe, huhut dungo jala jugul tongtong, tumangiangkon saluhut angka na badia,
• Rom 15:30 Alai huapoi ma hamu ale angka dongan, marhitehite Tuhanta Jesus Kristus dohot marhitehite holong ni roha ni Tondi i: Dongani hamu ma ahu marungkil marhite sian na tumangiangkon ahu tu Debata.
• Joh 17:9 Ndang apala portibi on hutangiangkon, nasida on do, angka na nilehonmi tu Ahu, ai Ho do nampuna nasida.
• 1 Tim 2:1-2 Onpe, on do sipaingothu, naeng ma ulahononhon parjolo situtu pangidoan, partangiangon, parpangondianon dohot hamauliateon humongkop saluhut halak,humongkop angka raja dohot saluhut parhuaso, asa marsonangsonang jala so hariboriboan hita marpangalaho, di bagasan sandok hadaulaton dohot hahormaton.
• Lukas 6:28 Pasupasu hamu ma angka na mamburai hamu, tangiangkon hamu ma angka na mangasupi hamu.
• Roma 8:26-27 Alai nang Tondi i, diurupi do hita di hagaleonta i; ai ndang taboto, manang aha na tama sipangidoonta, gabe diondihon Tondi i do hita marhitehite hata na hinoihon na so tangkas hinatahon. Alai diboto Sitanda roha i do na pinarrohahon ni Tondi i, ai marguru tu lomo ni roha ni Debata do pangondihonna di angka na badia i.