SERMON EPISTEL MINGGU 1 MEI 2011

MANGHANGOLUHON HALUAON

Ep.  1Petrus 1 : 3-9.

1:3 Pinuji ma Debata, Ama ni Tuhanta Jesus Kristus, naung manubuhon hita paduahalihon, sian godang ni asi ni rohana, marhitehite haheheon ni Jesus Kristus sian angka na mate, asa marpangkirimon na mangolu hita.

1:4 Di siteanon na manongtong, na so marlindang, na so ra malos, na sinimpan di banua ginjang di hamu.

1:5 Ai diramoti do hamu hinorhon ni gogo ni Debata marhitehite haporseaon, asa sahat tu haluaon, naung rade sipapataron di tingki na parpudi i.

1:6 I do dihalashon hamu, nang pe marsak hamu satongkin nuaeng, di bagasan ragam ni pangunjunan, molo tung ingkon i.

1:7 Ai naeng jumpang do hatauon ni haporseaonmuna, na andul ummarga sian sere na so manahan, nang pe diuji api i, bahen pujipujian dohot hamuliaon dohot hasangapon, di hapapatar ni Jesus Kristus i.

1:8 Atik pe so dung diida hamu Ibana, dihaholongi hamu do Ibana, na hinaporseaanmuna, nang so diida hamu Ibana nuaeng, gabe mariaia do hamu, di bagasan halalas ni roha na so tarhatahon jala na tongam,

1:9 gabe jaloonmuna do ujung ni haporseaonmuna, i ma haluaon ni tondimuna

Hatorangan

1.    Tapuji ma Debata naung paluahon hita

Tuhan Jesus Kristus do paluahon hita marhite hamamateNa dohot haheheonNa sian na mate. Hita halak pardosa na ingkon mate hian saleleng ni leleng na, gabe marpanghirimon di hangoluan na saleleng ni lelengna. Maol do diantusi halak haluaon na songon dia do na dapot hita marhite Kristus, songon pangatusion taringot tu na tubu paduahalihon (Yoh 3 : 3-7). Haluaon na dapot hita marhite haheheon ni Kristus ndada haluaon na di portibion, alai haluaon sogot do, ima panghirimon na mangolu taringot tu harajaon banua ginjang i.

Alani patut do pujionta Jahowa, ala naung dilehon anakNa Tuhan Jesus Kristus mate humophop hita, jala hehe manghamonangkon hamatean i, gabe dang sihabiaran be hamatean ai holan paradianan nama i, paima masuk hita tu hangoluan na saleleng ni lelengna. Alani barani ma hita mandok : “Jo hamatean, didia hamonanganmi? Jo hamatean, didia soropmi? ( I Kor 15:55 ).

2.    Tongtong mandok mauliate uju ro pangunjunan

Paulus mandok di I Tes 5:18 “Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus”. Lapatanna ndada na tahalomohon molo ro angka pangunjunan dohot haporsuhon, alai disaluhut angka na masa dibagasan ngolunta sai adong do solot asi ni roha ni Debata na patut si hamaulitehononta. Pangunjunan dohot haporsuhon dang boi padaohon hita sian Debata, alai ingkon ma gabe pasolhothon hita tu Ibana. Ai marhite pangunjunan i do hita dapotan habengeton, jalan habengeton i manghorhon hatauon jala hatauon i manghorhon panghirimon. (Rom 5 : 3-4). Marhite pangunjunan gabe jumpang ma hatauon ni haporseaonta. Alani tongtong ma tadok mauliate tu Tuhanta molo masa pe haporsuhon di ngolunta, asa margogo hita mangadopi saluhutna i, gabe monang hita maradophon nasa pangunjunan i, molo tung ingkon masa i di ngolunta

3.    Masihaholongan ma hita

Holong ima ondolan ni hakristenon, songon patik holong naung niajarhon ni Tuhan Jesus ima “Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim!” (Luk 10:27). Di tingki parpudi Tuhan Jesus rap dohot siseanna didok do : “Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan. Apala sian on ma tandaon ni halak saluhutna, hamu siseanku: Molo masihaholongan hamu. (Yoh. 13:34-35).

Holong na niajarhon ni Tuhan Jesus ndada holan holong vertical tu Ibana alai dohot do holong horizontal tu angka dongan jolma. Alani do didok : “Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?.....Na mangkaholongi Debata, i ma na mangkaholongi nang donganna. (1Yoh 4 : 20-21). Masihaholongan ima na masiurupan dohot masitangiangan.

Panimpuli

Tahangoluhon ma haluaon naung tajalo ala haheheon ni Kristus marhite namangulahon lomo ni rohaNa. Ai nunga adong be di hita “ticket” haluaon i, nanaeng jaloonta di ujungni haporseaonta sogot. Antong taradoti ma i. asa unang adong mambuat tumpal-ta i. AMEN