NARASI PASSION II

GETSEMANE

             Dung i sahat ma Jesus rap dohot nasida tu porlak sada na margoar Getsemane. Jadi didok ma tu angka sisean i: “Hundul ma hamu jolo dison, saleleng disan Ahu martangiang”. Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. Jala didok ma tu nasida: “Mansai marsak situtu do rohangku, hira na mate do. Dison ma hamu, dungo rap dohot Ahu!”.  Dung i laho ma Ibana saotik tujolo, dipatungkap ma bohina tu tano martangiang, ninna ma: “Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do!”. Dung i mulak ma Ibana tu angka siseanna, jala tarpodom do nasida didapot, jadi didok ma tu si Petrus: “Ndang margogo hamu hape dungo rap dohot Ahu nanggo sangombas? Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging!”. Dung i laho ma Ibana paduahalihon martangiang, ninna ma: “Ale Amang, molo so tarbahen salpu on, nda ingkon huinum, sai saut ma lomo ni Roham!”. Dung i di na ro i Ibana, tarpodom muse ma nasida didapot, ai mansai dokdok do salibonnasida. Jadi ditadingkon ma nasida, diulakkon ma laho martangiang patoluhalihon, mandok hata ondeng. Dung i didapothon ma muse angka siseanna jadi didok ma tu nasida: “Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa. Hehe ma hamu, laho ma hita! Ndi, nunga, ro na pasahathon Ahu!”.

TARJEHE TUHAN JESUS

            Mangkatahon i dope Ibana, nunga ro si Judas, sada sian na sampuludua i, rap dohot torop halak, angka na marpodang jala marlombutlombut, sinuru ni angka sintua ni malim dohot sintua ni bangso i. Alai nunga dipabotohon parjehe i hian partinandaan tu nasida, ai didok do: Ia i na huumma, Ibana ma i; i ma tangkup hamu! Asa pintor didapothon ma Jesus, didok ma: Tabi di Ho, Guru! Laos diumma. Alai ninna Jesus ma mandok ibana: “Marhua ho tuson, anggia?”. Dung i ro ma nasida, dilaluhon ma tangannasida tu Jesus manangkup Ibana. Dung i adong ma sada sian angka dongan ni Jesus mangalaluhon tanganna, disintak ma podangna, ditampulhon ma tu naposo ni sintua ni malim sahalak, dipisikkon ma pinggolna. Jadi didok Jesus ma tu ibana: “Pasarung podangmi, ai na manintak podang, mago ma bahenon ni podang! Ai na so tarbahen Ahu do di roham mangido sian Damang, asa dipadiri di Ahu saonari lobi sian sampuludua loksa surusuruan? Alai songon dia ma disi saut hata ni Surat i na mandok: Ingkon masa do na songon i?”. Uju i ma didok Jesus tu angka natorop i: “Hira na dompak panamun do hamu hehe, marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu. Alai na masa do sudena on, asa jumpang hata ni angka panurirang i”. Dung i ditadingkon saluhut sisean i ma Ibana laho maporus.

DIBOAN JESUS TU JOLO NI SI KAYAPAS

            Asa dung ditangkup nasida Jesus, ditogihon ma Ibana tujolo ni sintua ni malim si Kayapas, ai nunga pungu disi angka sibotosurat ro di pangituai. Alai sai mangihut do si Petrus mandaodao sahat ro di alaman ni sintua ni malim i. Laos bongot ma ibana tubagasan, laho hundul tusi rap dohot angka naposo marnida ujungna. Alai anggo angka sintua ni malim ro di sandok rapot godang mangalului panindangion gapgap dompak Jesus, na tuk mambahen Ibana marutang hosa. Alai nang pe hehe torop sitindangi gapgap, ndang adong jumpangsa. Alai parpudi ro ma dua halak, ninna ma: Didok Halak on: Tarbahen Ahu do mangalohai joro ni Debata jala pajongjong i sumuang di bagasan tolu ari. Dung i hehe ma sintua ni malim i, mandok tu Ibana: Ndang alusanmu na hinatindangkonnasida dompak Ho? Alai sai hohom do anggo Jesus. Dung i dipanghulingi sintua ni malim i ma Ibana: Hupatolon ma Ho tu Debata Siparngolu i, asa dipaboa Ho tu hami, manang na tutu Ho Kristus, Anak ni Debata! Dung i didok Jesus ma tu ibana: “Songon na nidokmi ma tutu! Alai hudok ma tu hamu: Olat ni on ma idaonmuna Anak ni jolma i, hundul di siamun ni Hagogoon jala ro di atas ombun ni langit”. Gabe diribakkon sintua ni malim ma pangkeanna mandok: Na mangaleai Debata do Ibana! Pola luluan dope sitindangi? Nunga dibege hamu pangaleaina i! Beha do di rohamu? Dung i ninna nasida ma mangalusi: Marutang hosa ma Ibana! Jadi ditijuri nasida ma bohina, na deba manompuk, na deba mangalinsingi, huhut mandok: Surirangi hami, Kristus, ise do na mamunu Ho?

SIMON PETRUS MANSOADAHON JESUS

             Alai na hundul do anggo si Petrus di alaman i, jadi didapothon sada parompuan ma ibana mandok: Dohot do ho dongan ni Jesus, na sian Galilea i! Jadi disoadahon ma di jolonasida saluhutna, ninna ma: Ndang huboto na nidokmi! Dung i di na naeng haruar ibana, diida parompuan na asing ma ibana, didok ma tu angka na disini: On do sada dongan ni Jesus na sian Nasaret! Jadi diulahi ma mansoadahon, pola manolon: Tung na so hutanda do Halak i! Alai dung satongkin nari, didapothon angka na jongjong disi ma si Petrus mandok: Sintong tahe, dohot do ho sada sian nasida, ai pangkulingmi do patandahon ho! Dung i dipambuburahon ma dirina huhut manolonnolon: Tung na so hutanda do Halak i, ninna. Jadi pintor martahuak ma manuk. Jadi diingot si Petrus ma na hinatahon ni Jesus tu ibana: Tolu hali soadahononmu Ahu, tagan so martahuak dope manuk. Dung i laho ma si Petrus tu balian tumatangis situtu.

MANINGKOT SI JUDAS

             Torang ni arina i martuptup ma sude angka sintua ni malim dohot sintua ni bangso i dompak Jesus, laho mamusa Ibana. Ditali jala ditogu nasida ma Ibana laho pasahathon tu panguhum si Latus. Jadi dung diida si Judas, parjehe i, na naeng hona uhum nama Ibana, disolsoli ma rohana, dipaulak ma na tolupulu rupia i tu angka sintua ni malim dohot tu sintua ni bangso i; ninna ma: Sala do ahu! Hujehehon do hape na so marpipot! Alai didok nasida ma: Ndang ro di hami i! Ho do na sari disi! Jadi ditimpalhon ma perak i tu bagasan joro i, laos sumurut sian i laho maningkot. Alai dibuat angka sintua ni malim ma hepeng i, ninna ma: Ndang jadi padomuon i tu arta ni joro, ai tuhor ni mudar do i! Jala mardos ni roha nasida manuhorhonsa tu ladang ni pande hudon, bahen parbandaan ni halak dagang. Ala ni i do umbahen na margoar i ladang mudar ro di sadari on. Disi ma jumpang hata ni panurirang Jeremia na mandok: "Dibuat nasida do na tolupulu rupia i, asam ni na niasam, diasam deba anak Israel. Dung i dilehon ma i manuhor ladang ni pande hudon, songon na nidokkon ni Tuhan i tu ahu”. 

Maningkot ma si Judas, tungkap ibana madabu, mapultak ma dagingna, gabe sabur ma nasa raoanna. Saluhut pangisi ni huta Jerusalem do umbotosa, umbahen na digoari ladang i di hatanasida Akeldamak, astuanna: Tano mudar.

TUHAN JESUS DI JOLO NI LATUS

          Dung torang ari, martuptup ma angka sintua ni malim raphon angka panungganei, angka sibotosurat dohot sandok rapot godang i, jadi ditali nasida ma Jesus, mamboan jala pasahathon Ibana tu si Latus. Dialuhon nasida ma Ibana, ninna ma: Na dapot hami do on pabalikbalikkon bangsonami jala mangorai mangalehon guguan tu Kesar i; dipandok, Raja Kristus do Ibana. Gabe disungkun si Latus ma Ibana: Ho do Raja ni Jahudi i? Jadi dialusi ma ibana, ninna ma: “Songon na nidokmi ma tutu!”. Dung i ninna si Latus ma mandok angka sintua ni malim dohot natorop i: Ndang adong dapot ahu sala ni Halak on!. Alai godang do dipartuhashon angka sintua ni malim dompak Ibana. Jadi diulahi si Latus ma manungkun Ibana: Ndang alusanmu i? Godangna i dituhashon nasida dompak Ho! Alai ndang dialusi Jesus agia aha, pola longang roha ni si Latus. Alai lam digogohon nasida do mandok: Digunturi Ibana do bangso i, ai sai mangajari Ibana di sandok tano Judea, mamungka sian Galilea sahat ro tuson. Alai umbege i si Latus, manungkun ma ibana, manang halak Galilea Ibana? Jala dung diboto, na sian gomgoman ni si Herodes Ibana, disuru ma Ibana tujolo ni si Herodes, ai tongon do ibana di huta Jerusalem uju i.

DIJOLO NI SI HERODES

             Marnida Jesus si Herodes i, las situtu ma rohana; ai nunga na nia lelengna, sai naeng idaonna Ibana, ala naung dibege baritana, jala diarop rohana, idaonna tanda sada sipatupaonna. Jadi godanggodang ma disungkunhon tu Ibana; alai ndang adong dialusi Jesus ibana. Disi do angka sintua ni malim ro di sibotosurat, jala gogogogo do Ibana dialuhon. Ia si Herodes rap dohot angka donganna, direhei jala dilealeai do Ibana, disolukkon ma pangkean na arga tu Ibana, laos songon i ma disuru Ibana mulak tu si Latus. Jadi di na sadari i ma maraleale si Herodes dohot si Latus, ai na masihosoman do nasida anggo nasailaon

DIPAULAK MUSE JESUS TU SI LATUS

             Alai didokkon si Latus ma angka sintua ni malim, angka panungganei ro di natorop i marpungu, ninna ma mandok nasida: Diboan hamu do Halak on tu jolongku, sipabalik bangso didok hamu; jala di jolomuna hutangkasi i, gabe ndang adong jumpang ahu di Halak on sala, angka na tinuhashonmuna tu Ibana. Si Herodes pe songon i do, disuru do Ibana mulak tu jolonami; asa ndang adong parulaonna, na tama mambahen Ibana marutang hosa. Dibahen i lasahanku ma Ibana, asa pinalua. (Ai dirimpu si Latus, molo nunga marsap mudar Jesus i dilasahi gabe asi ma roha ni natorop i). Dung i ditogu si Latus ma Jesus, didokkon ma linsingan. Jadi didandani angka soldadu ma sungsang duri bahen tumpal, diampehon ma i tu uluna; baju dapdap ma dialithon tu dagingna. Dung i ro ma nasida tu jolona mandok: Tabi di Ho, ale raja ni Jahudi! Laos dipastapi ma Ibana. Dung i ruar ma muse si Latus, didok ma tu angka Jahudi: Ida hamu ma, hutogihon do Ibana tu jolomuna, asa diboto hamu, na so adong jumpang ahu salana. Laos ruar ma Jesus manjujung sungsang duri jala marbaju dapdap. Jadi didok si Latus ma tu nasida: Ida hamu ma Jolma i! Asa dung diida angka sintua ni malim dohot angka naposo Ibana, dijouhon nasida ma:  “Parsilangkon ma Ibana, Parsilangkon ma Ibana!”.

Dilului si Latus dope dalam paluahon Jesus i. Molo jumping ari Pesta, somal dipalua tu nasida sada halak na tarhurung, hombar tu na pinangido ni rohanasida. Jadi adong ma sada halak na margoar si Barabas, rap tarhurung dohot angka panggunturi, naung mambunu jolma di na guntur i. Jala nangkok ma na torop i laho mangido, asa dibahen tu nasida songon na somal. Gabe ro ma si Latus mangalusi nasida: Atehe, denggan do rohamuna hupalua tu hamu raja ni halak Jahudi i? Ai diboto, na sian late ni roha do dipasahat angka sintua ni malim Ibana. Alai digintali angka sintua ni malim do natorop i, asa tagonan si Barabas dipalua tu nasida. Jala ninna si Latus ma muse mangalusi nasida: Antong, dia do dipangido rohamu bahenonku tu na ginoarmuna: Raja ni Jahudi? Alai dijouhon nasida ma: Parsilangkon Ibana! Gabe didok si Latus ma mandok nasida: Ai aha do na jat dibahen? Alai lam digogo ma manjouhon: Parsilangkon ma Ibana!. Asa dung diida si Latus, na so marguna hatana, lam ganda tahe gaorna, dibuat ma aek mamburi tanganna di jolo ni natorop i, huhut mandok: Lias do ahu sian mudar ni On! Hamu do na sari disi! Dung i ninna sude natorop i ma: Marsapata tu hami dohot tu ianakhonnami ma mudarna i! Dung i saut ma dipalua si Barabas; alai anggo Jesus dilinsingi, dung i dipasahat ma, asa diparsilangkon.