NARASI PASSION I

Panurirangon ni Jesus Taringot tu sitaononNa     

Alai di na pungu i nasida di Galilea, didok Jesus ma tu nasida: “Sipasahaton ma Anak ni jolma i tu tangan ni halak. Pola do mate Ibana bunuonna, dung i pangoluon do Ibana di ari patoluhon”. Jadi bobonosan situtu ma rohanasida 
            Asa diarahon Jesus ma siseanNa na sampulu dua i, ninna mandok nasida “Na nangkok ma hita tu Jerusalem, pasahatonna ma disi Anak ni jolma i tu angka sintua ni malim dohot tu sibotosurat, gabe uhumonnasida ma Ibana, ingkon marutang hosa. Dung i pasahatonnasida ma Ibana tu parbegu, asa diinsahi, dilinsingi jala diparsilangkon. Dung i mulak mangolu ma Ibana di ari patoluhon”. Alai Ndang diantusi nasida agia otik sian i; na buni do hata i sian rohanasida, ndang diboto nasida na hinatahonNa i.

            Dung i dipansang angka sintua ni malim dohot angka Parise i ma rapot godang, didok nasida ma: Aha ma bahenonta? Ai lan do tanda dibahen Halak i! Molo tapasombu Ibana, porsea ma halak saluhutna di Ibana, gabe ro ma halak Rom maon mangarampas tanonta dohot bangsonta. Alai hehe ma sada sian nasida, i ma si Kayapas, sintua ni malim di na sataon i, didok ma tu nasida: Na hurang roha do hamu! Ndang dipingkiri rohamuna, dengganan do mate sada halak humongkop natorop i, unang laho mago sandok bangso i. Alai ndang sian rohana sandiri dihatahon i; ala sintua ni malim ibana di na sataon i, umbahen na disurirangkon, na naeng mate ma Jesus humongkop bangso i. Alai tahe, ndada holan laho mangkongkop bangso i; alai naeng papunguonna angka anak ni Debata, angka na marserak dope, laho pasadahonsa. Asa olat ni na sadari i martuptup i ma nasida laho mamusa Ibana.

Hosianna! Pinasupasu ma na ro marhite Goar ni Tuhan i, Raja ni Israel!

            Dung i onom ari nari asa dapot pesta Paska i, sahat ma Jesus tu huta Betania, na niinganan ni si Lasarus, na sinunggul ni Jesus sian na mate. Jadi dipauli nasida ma disi panganon ujuan di Ibana; si Marta do marhobasi, si Lasarus ma sada donganna mangan disi. Gabe dibuat si Maria ma sahat i miak Nardus na arga na so marsaor, dimiahi ma pat ni Jesus, obukna ma dibahen mangalapu. Jadi digohi uap ni miak i ma bagas i. Jadi sada sian angka siseanna, si Judas Iskariot na naeng manjehehon Ibana, mandok : “Boasa so ginadis miak i arga tolu ratus hupang, bahen silehonlehon nian di angka na pogos? Alai ndada na pogos sinarihonna, umbahen na didok songon i; panangko do ibana tahe, diusung do asiasi ni halak, ai tu ibana dipasahat puro i. Dung i ninna Jesus ma: “Pasombu ma ibana, ai diparade do i hira tu ari hatatanomhi. Ai tongtong do adong na pogos di tongatongamuna, alai anggo Ahu ndang tongtong di lambungmuna”.

            Dung i torang ni arina i dibege halak natorop na ro tu pesta i, na naeng ro ma Jesus tu Jerusalem. Jadi dibuat nasida ma angka maremare, laho manomunomu Ibana huhut dijoujouhon: Hosianna! Pinasupasu ma na ro marhite Goar ni Tuhan i, Raja ni Israel! Jala halak Parise i deba, na sian natorop i, mandok tu ibana: “Orai ma antong angka siseanmi, Guru!” Jala ninna ma mangalusi: Hudok ma di hamu: “Aut mauhom nasida, joujou ma angka batu”.. Dung i dapot Jesus ma halode sada, i ma dihunduli, hombar tu na tarsurat: "Unang ho mabiar, boru Sion; ida ma, Rajam do na ro, marsihundul di anak ni halode!". Alai ndang diantusi angka siseanna i hian; dung pe marsangap Jesus, asa diingot nasida, naung marhahonaan tu Ibana do hape na tarsurat i ro di pambahenannasida tu Ibana. Laos dihatindangkon natorop, angka na mandongani Ibana do, paboa naung jinouna i si Lasarus sian tanoman, laho manungguli ibana sian na mate. Jadi ala naung dibege natorop i barita ni tanda na binahenna i, umbahen na ditomu nasida Ibana. Jadi didok angka Parise ma sama nasida: “Diida hamu do, na so marniula na binahenmu, ai liat portibi on do paihutihut Ibana”.  

            Alai dibongoti sibolis i do si Judas na margoar Iskariot, sahalak sian na sampuludua i. Gabe laho ibana martuptup dohot angka sintua ni malim raphon angka panungganei, manang dia dalanna pasahathon Ibana tu nasida. Jadi sian las ni rohanasida marpadan ma nasida, mangalehon hepeng tu ibana. Dioloi si Judas ma i, jadi dilului ma tingki na une pasahathon Ibana, so sian pamotoan ni natorop i.

Parpadanan na Badia

            Jadi di ari parjolo ni pesta Paska, di na somal dipotong birubiru Paska i, ro ma hata ni angka sisean i tu Ibana: “Tudia ma hami laho paturehon panganon Paska i, dipangido roham?”. Jadi disuru Ibana ma siseanna dua halak, didok ma tu nasida: “Laho ma hamu tu huta i, pajumpang ma hamu disi dohot sada halak na mangusung aek sahudon; ibana ma ihuthon hamu!  Jadi dok hamu ma tu nampuna jabu na binongotanna i: Tona ni Guru i tu ho: Didia do bilut inganan, asa disi hupangan hami Paska i rap dohot siseanki? Jadi patuduhononna ma tu hamu bilut parginjang sada, na lambas, na tipak hinembangan, disi ma pature hamu di hita!”. Borhat ma siseanna i, dibongoti ma huta i, jadi jumpang nasida ma tutu songon na nidokna i, gabe dipature ma Paska i. Asa dung bot ari, ro ma Ibana rap dohot na sampuludua i. Dung i hundul ma nasida mangan, gabe didok Jesus ma: “Na tutu do hatangkon tu hamu: Sada sian hamu on, na rap mangan dohot Ahu, pasahathon Ahu!” Gabe marsak ma rohanasida jala sadasada ma nasida mandok tu Ibana: Nda tung ahu i? Alai ninna Ibana do mangalusi nasida: “Sada sian hamu na sampuludua on, na rap dohot Ahu manornophon tu bagasan paringkauan! Tong do nian ujung ni Anak ni jolma i, songon na tarsurat hian; alai marjea do halak na gabe parhitean pasahathon Anak ni jolma i! Tagonan unang tubu Ibana!” Jadi di na mangan i nasida, dihindat Jesus ma roti, dipasupasu ma, diponggoli jala diparlehon ma tu nasida, huhut ma didok: “Jalo hamu ma; Dagingku do on!” Dung i dihandit ma panginuman, didok ma mauliate, dilehon ma tu nasida, gabe saluhut do nasida manginum sian i. Laos didok ma tu nasida: “Mudarhu do on, mudar parpadanan i, na niusehon humongkop torop halak. Na tutu do hatangkon tu hamu: Na so tupa be inumonku olat ni on sian parbue ni hau anggur i sahat ro di ari sogot: Disi ma inumonku na imbaru di harajaon ni Debata”.

Diburi Jesus Pat ni SiseanNa

            Hehe ma Ibana sian na mangan i, ditanggal ma ulosna, dibuat ma basahan, ditapolhon tu Ibana. Diusehon ma aek tu sambong, dung i diburi ma pat ni angka siseanna, diapusi ma dohot basahan na tinapolhonna i. Dung i sahat ma Ibana tu si Simon Petrus, jadi didok i ma mandok Ibana: Tung Ho ma, ale Tuhan, mamburi pathu? Dung i ninna Jesus ma mangalusi ibana: “Ndang diantusi ho pambahenankon na tu ho anggo nuaeng; muse pe botoonmu i.” Dung i didok si Petrus ma tu Ibana: Matua tano on ndang burionmu pathu! Dung i ninna Jesus ma mangalusi ibana: “Molo so burionku ho, ndang partohap ho di Ahu!” Dung i ninna si Simon Petrus ma: Ale Tuhan, unang ma holan pathu, dohot ma tangan dohot ulungku! Gabe didok Jesus ma tu ibana: “Halak naung maridi i, ndang ingkon be burion, ai nunga sude ibana ias. Naung ias do anggo hamu, alai ndang luhut hamu.” Ai ditanda do sipasahat Ibana, umbahen na didok: Ndang saluhut hamu ias! Asa dung diburi Jesus patnasida dipangke ma muse ulosna, hundul ma Ibana, didok ma tu nasida: “Ai diantusi hamu do pambahenanki tu hamu? Digoar hamu do Ahu Guru jala Tuhan, jadi ture do pandokmuna disi; ai i do Ahu tutu. Asa molo Ahu, Tuhan jala Gurumuna, mamburi patmuna, tama ma nang hamu masiburian pat! Ai sitiruon do hulehon tu hamu, asa dibahen hamu songon naung hubahen i tu hamu! Na tutu situtu do na hudok on tu hamu: Ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa!”.

Si Judas Parjehe

            Asa dung didok Jesus hata ondeng, bonsa ma rohana, dung i dihatindangkon ma, ninna ma: Na tutu situtu do na hudok on tu hamu: “Sahalak sian hamu na pasahathon Ahu!”. Dung i masiberengan ma angka sisean i, jut ma rohanasida, manang ise na nidokna disi. Alai adong ma sada sian angka siseanna i, na hundul jumonok tu Ibana, haholongan ni Jesus i. I ma dihilap si Petrus jadi ninna ma mandok ibana: Sungkun ma, ise i na nidokna i! Jadi dipadonok ma tu lambung ni Jesus mandok tu Ibana: Tuhan, ise i? Gabe dialusi Jesus ma: Ia tusi hulehon na santapik na husornophon on, i ma ibana! Jadi disornophon ma santapik, dilehon ma tu si Judas Iskariot anak ni si Simon. Jadi dung dibondut i, dibongoti sibolis i ma ibana. Dung i didok Jesus ma tu ibana: "Humatop ma ula siulaonmi!" Alai ndang adong manang ise sian nasida na mangan i, na umboto astuan ni na nidokna i. Ai ala di ibana puro i, gabe dirimpu na deba, didokkon Jesus ibana manuhor na hasea tu pesta i, manang marsilua tu na pogos. Asa dung dijalo si Judas na santapik i, pintor laho do ibana tu balian; alai borngin ma uju i!.