Selamat datang di blog sederhana ini, kiranya menjadi berkat bagi kita semua

Senin, 25 April 2011

JAMITA MINGGU 01 MEI 2011

TANDA JALA OLOI MA TUHAN I

Ev. Johannes 21:1-14.
21:1 Dung i dipatuduhon Jesus ma Ibana muse tu angka siseanna di topi tao Tiberias. Jala songon on do pangalahona:
21:2 Pungu ma si Simon Petrus dohot si Tomas na margoar Linduat, angkup ni i si Natanael sian Kana na di Galilea dohot angka anak ni si Sebedeus, rap dohot dua nari sian angka siseanna i.
21:3 Gabe ro ma hata ni si Simon Petrus tu nasida: Laho ma ahu mardengke. Jadi didok nasida ma tu ibana: Dohot ma hami! Laos borhat ma nasida, bongot ma tu parau; alai ndang dapot nasida agia aha di na saborngin i.
21:4 Alai di na torang ari, jongjong ma Jesus di pasir; alai ndang ditanda angka sisean i Ibana.
21:5 Jadi didok Jesus ma tu nasida: Ndang adong dengkemuna, ale angka anaha, nanggo saotik? Jadi ro ma alusnasida: Ndang adong!
21:6 Dung i didok ma tu nasida: Sampakkon hamu ma jalamuna tu siamun ni parau i, asa dapotan hamu! Jala disampakkon nasida ma, gabe ndang tartait nasida be jala i dibahen godang ni dengke i.
21:7 Dung i didok sisean haholongan ni roha ni Jesus i ma tu si Petrus: Tuhan i do i! Jadi dung dibege si Simon Petrus, Tuhan i do i hape, dialithon ma abitna, ai ndang marabit hian ibana; dung i ditimbung ma tu tao i.
21:8 Alai marparau do angka donganna sisean i sahat, huhut sumarat jala na marisi dengke i; ai ndang sadia dao nasida sian darat i, arga duaratus elak nama.
21:9 Jadi dung sahat nasida ro di darat, diida ma gara disi dohot dengke peak di ginjangna, angkup ni roti.
21:10 Dung i didok Jesus ma tu nasida: Boan hamu ma tu on deba dengke sian angka na dapot hamu nangkin!
21:11 Gabe manaek ma si Petrus tu parau, disarat ma jala i tu darat, gok dengke na balga, saratus limapulu tolu toropna; atik pe na sa i toropna, ndang na maribak jala i.
21:12 Jadi didok Jesus ma tu nasida: Ro ma hamu mangan! Alai ndang adong manang ise sian angka sisean i, na hum roha manise Ibana: Ise do Ho? Ai diboto be, Tuhan i do Ibana.
21:13 Asa ro ma Jesus, dibuat ma roti i, diparlehon ma tu nasida, angka dengke i pe songon i do.
21:14 I ma patoluhalihon dipatuduhon Jesus Ibana tu angka siseanna, dung hehe Ibana sian angka na mate.


Hatorangan

Ay 1:    “Dung i dipatuduhon Jesus ma Ibana muse tu angka siseanna di topi tao Tiberias. Jala songon on do pangalahona :”
Tao Tiberias ima sada tao namaringanan di luat Galilea, alani jotjot do digoari i muse tao Galilea. Boasa ma di Galilea nasida (angka sisean ni Tuhan Jesus) tingki i?, tapamanat ma jolo angka ayat-ayat na marpardomuan tusi :
-          Mat. 28:10 - “Jadi didok Jesus ma tu nasida: Unang hamu mabiar, laho ma hamu mandokkon angka anggingku tu Galilea, disi ma idaonnasida Ahu!”
-           Mark 14:28 - “Alai dung hehe Ahu sian na mate, joloananku ma hamu tu Galilea”.
-           Mark 16:7 - “Laho ma hamuna, paboa hamu ma tu angka siseanna dohot tu si Petrus: Joloananna do hamu tu Galilea, disi ma idaonmuna Ibana, songon naung didok hian tu hamu”.
Molo di Yoh. 20:17, dipatuduhon Jesus diriNa tu siseanNa tingki marpungu nasida di sada inganan na tarsordak alani biar nasida, alai di turpuk on, dipatuduhon Jesus diriNa tu nasida di tingki manjala dengke nasida songon ulaon na somal diula nasida siganup ari.  

Ay 2:    “Pungu ma si Simon Petrus dohot si Tomas na margoar Linduat, angkup ni i si Natanael sian Kana na di Galilea dohot angka anak ni si Sebedeus, rap dohot dua nari sian angka siseanna i.
Adong 7 sisean ni Tuhan Jesus na pungu disi di tingki ro Tuhan Jesus patuduhon diriNa, ima : Simon Petrus, Tomas , Natanael, Yakobus & Yohanes (angka anak ni si Sebedeus), dohot dua halak nari siseanna na so didok goarna. (Didok na deba dang sian sisean na sampulu dua i si dua halak on, alai na targoar do nasida “sisean” ala sai dohot nasida mangihuthon Jesus rap dohot sisean na 12 i.)

Ay 3:    “Gabe ro ma hata ni si Simon Petrus tu nasida: Laho ma ahu mardengke. Jadi didok nasida ma tu ibana: Dohot ma hami! Laos borhat ma nasida, bongot ma tu parau; alai ndang dapot nasida agia aha di na saborngin i.
Sungkun-sungkun do roha, ia dung mate Jesus naung mulak do ulaning angka siseanNa i tu ulaonna siganup ari naung leleng ditinggalhon i? Taida ma piga-piga tafsiran taringot tusi :
-          Didok angka penafsir, memang deba sian angka sisean i nunga mulak be tu ulaon nasida siganup ari. Boi do tarjalo roha , ala naung mate Jesus songon Guru dohot “pemimpin”, na saleleng on mamboan nasida mardalani laho mamaritahon taringot tu harajaon banua ginjang, gabe mulak ma nasida muse tu parngoluon portibi na diula nasida tingki so ditogihon Jesus nasida mangula di ngolu partondion. Di Luk. 24 : 19-21, tarida do holso ni roha nasida ala so dapot songon na hinirim ni roha nasida taringot tu Jesus. Ai saut do hape mate Jesus i, dang adong paraloan, dang dipataridahon huasoNa laho mangalo angka halak na menginsahi, mangarehei, manijuri dohor mamparsilangkon Ibana. Alani boi dohonon adong pandelean di nasida laho manorushon ulaon ni Jesus i, tumagonan ma nasida mulak tu ulaonna siganup ari.
-          Tung pe naung dipatuduhon Jesus diriNa tu si Petrus dung hehe Ibana, alai dang dirajumi rohana dope na ingkon gabe apostel ibana, jala dang diboto si Petrus aha do naeng siulahononna songon sahalak sisean (apostel), ido ra alana asa gabe mulak ibana tu ulaonna na somal ima panjala dengke.
-          Alai Adong deba na mandok, tingki i dang dope adong parsuruon tu nasida laho mamaritahon haheheon ni Tuhan Jesus, paima hananaekNa tu banua ginjang sahat tu na ro muse Tondi Parbadia bongot tu nasida di Yerusalem, dungi sian i ma nasida mamungka  ulaon ha-apostel-on tu sandok portibi on. Alani paima ro tingki i, songon naung tinonahon ni Tuhan Jesus, marpungu ma nasida di Galilea, alai mamangke tingki, laho ma nasida manjala asa adong sipanganon nasida.

Ay 4:    “Alai di na torang ari, jongjong ma Jesus di pasir; alai ndang ditanda angka sisean i Ibana.
Adong do manang piga sibonsiri asa dang ditanda nasida Tuhan Jesus di tingki i :
-          Hata “ di na torang ari” boi do dilapati “manogotna” manang “lao torang ari”. Mangihuthon terjemahan Bibel KJV (king James Version)  didok “But when the morning was now come” (= Alai dung ro ma manogotnai), dohot Bibel NIV didok “early in the morning”  (= tung mansai sogot). Alani boi dohonon dimanogotnai dang haru torang dope pamerengan, gabe dang ditanda nasida Jesus.
-          Antar dao do nasida sian pasir i ( di Ay. 8 didok dao nasida sian i 200 elak = 90 meter )
-          Dang dihirim nasida naeng pajumpang dohot Jesus jala dang sian bulus ni roha nasida memerang dompak Jesus. Dirimpu nasida do Ibana halak na somal paimahon parau nasida laho manuhor dengke.

Ay 5-6: “Jadi didok Jesus ma tu nasida: Ndang adong dengkemuna, ale angka anaha, nanggo saotik? Jadi ro ma alusnasida: Ndang adong! Dung i didok ma tu nasida: Sampakkon hamu ma jalamuna tu siamun ni parau i, asa dapotan hamu! Jala disampakkon nasida ma, gabe ndang tartait nasida be jala i dibahen godang ni dengke i.
Aha ma na tabereng di disi?
-          Na tabereng disi ndada hambirang manang siamun ni parau i, alai boha do pangoloion nasida di pandok ni Jesus. Jotjot do taumpamahon sabola Siamun ima paruntungan, alai di turpuk on dang tusi hita lao mamereng, ai pangoloion di Kristus dang sai holan na mamboan paruntungan.
-          Halongangan do i? Na deba mandok dang, alai  gombaran ni na masa di ngolunta on do i,  ai jotjot do tumangkas halak mamereng na taula manang na tingkos do manang dang, sian hita sandiri.
-          Pangolion di Kristus manghorhon las ni roha. Diboto Tuhan Jesus do aha na naeng siulaonta, dompak dia do hita tama mangula, jala diboto Ibana do aha do ulaon na mambahen las ni roha di ngolunta. Alani taoloi ma Ibana, ai umboto do Tuhan Jesus sian hita.

Ay 7-8:  “Dung i didok sisean haholongan ni roha ni Jesus i ma tu si Petrus: Tuhan i do i! Jadi dung dibege si Simon Petrus, Tuhan i do i hape, dialithon ma abitna, ai ndang marabit hian ibana; dung i ditimbung ma tu tao i. Alai marparau do angka donganna sisean i sahat, huhut sumarat jala na marisi dengke i; ai ndang sadia dao nasida sian darat i, arga duaratus elak.
Dunga masa i, gabe ditanda nasida ma Tuhan Jesus, ai dipaingot na masa i do ibana di tingki na bongot Tuhan Jesus tu parau nasida di tao Genesaret,  gabe bahat situtu dapot nasida dengke, pola maribak jala nasida tingki i. (Luk 5 : 1-11).
Parjolo do si Johanes mananda Tuhan Jesus di tingki i, patuduhon na sai parjolo do si Johannes sian si Petrus molo dibagasn haporseaon, alai si Petrus sai jumolo do molo dibagasan pambahenan. Tarida doi na pintor ditimbung Ibana  tao songon na masa di tingki na mardalan Tuhan Jesus di sisik ni tao. (Mat. 14:22-33) .

Ay 9:    “Jadi dung sahat nasida ro di darat, diida ma gara disi dohot dengke peak di ginjangna, angkup ni roti..
Dang polo taboto sian dia do dengke dohot roti na peak di gara i, alai taboto do na tuk do Jesus patupahon lobi sian i, ima mangalehon mangan 5000 halak dohot 5 roti, 2 dengke. (Mat. 14:13-21).  

Ay 10-11: “Dung i didok Jesus ma tu nasida: Boan hamu ma tu on deba dengke sian angka na dapot hamu nangkin! Gabe manaek ma si Petrus tu parau, disarat ma jala i tu darat, gok dengke na balga, saratus limapulu tolu toropna; atik pe na sa i toropna, ndang na maribak jala i.
Adong saratus lima puluh tolu godang ni dengke na dapot nasida i, boasa ingkon pola dietong godang ni dengke i, angka penafsir mandok ima toropni jenis ni dengke na adong di tao i, martuduan do i na sude do hita jolma sian ganup bangso gabe “tarjala” laho mangihuthon Kristus.
Taringot tu “jala”  marlapatan doi inganan parsaoran ni naporsea (Huria) na dibongoti saluhut bangso, na universal, ndang mamereng  bangso, ras, warna kulit, dna. Alai dipasada dibagasan parsaoran ni halak Kristen na badia. Panjalaon i, ima gombaran ni panoguon ni angka apostel tu angka bangso na marragam i.
.
Ay 12-13: “Jadi didok Jesus ma tu nasida: Ro ma hamu mangan! Alai ndang adong manang ise sian angka sisean i, na hum roha manise Ibana: Ise do Ho? Ai diboto be, Tuhan i do Ibana. Asa ro ma Jesus, dibuat ma roti i, diparlehon ma tu nasida, angka dengke i pe songon i do”.
Tung pe naung dibagasan hasangaponNa Jesus dung hehe sian na mate, ndang pola porlu be mangan dohot minum, jala nunga didok di tingki Parpadanan na badia i :”Na so tupa panganonku be i, ia so dapot hagogokna i di harajaon ni Debata!...... Na so tupa be inumonku parbue ni hau anggur, paima songgop harajaon ni Debata”, Alai naeng patuduhon ni Ibana do na tutu situtu do Ibana hehe sian na mate, songon na tarsurat di Ul. Apostel 10:41 “ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate”

Ay 14: “I ma patoluhalihon dipatuduhon Jesus Ibana tu angka siseanna, dung hehe Ibana sian angka na mate.
Adong piga-piga hali Jesus patuduhon diriNa dung hehe, ima :
-          Tu si Maria Magdalena (Mark 16:9; Yoh 20:15-16)
-          Tu angka boru-boru na ro tu udean ( Mat. 28 : 9)
-          Tu dua halak sisean na mardalan tu Emmaus ( (Luk. 24 : 13)
-          Tu si Petrus sahalakna ( Luk. 24 : 34)
-          Tu 10 halak sisean (Yoh. 20: 19)
-          Tu 11 halak sisean (Yoh. 20 : 26)
-          Tu 7 halak sisean (songon na di Ay. 2 turpuk on)
-          Tu angka sisean di sad adolok di Galilea (Mat 28 :16)
-          Tu lobi 500  halak (1 Kor 15 : 6)
-          Tu si Jakobus (1 Kor 15: 7))
-          Tu sude sisean di Betania tingki hananaekNa u banua ginjang (Luk 24 : 50-53)

Jadi, dung hehe Ibana, adong do lobi hurang 11 hali dipatuduhon diriNa na paboahon natutu do Ibana naung hehe sian na mate. DI Ul. Apostel 1 : 3 didok : “Dung salpu haporsuhon na tinaonna i, dipatandaphon do dirina mangolu tu nasida marhitehite lan tanda, i ma na pinataridahonna dirina tu nasida leleng ni opatpulu ari, dohot mangkatahon taringot tu harajaon ni Debata”.

Sipahusor-husoron

  • Tahaporseai ma na tutu do hehe Jesus i.
  • Huhut paimahon tingki nung binuhul ni Debata di ngolunta, taulahon ma ulaonta di portibion dohot denggan hombar tu lomo ni rohaNa.
  • Oloi ma parsuruon ni Debata, asa dapot hita las ni roha marhite angka pasu-pasu ni Tuhanta dibagasan ngolunta.
  • Pangoloion na tutu ima na mangihuthon na nidok ni Debata dibagasan bulus ni roha. AMEN


Tidak ada komentar:

Poskan Komentar

HTML