JAMITA MINGGU 21 AGT 2011

MANANGIHON HATA NI DEBATA JALA MANGULAHONSA

Ev : Mateus 7 : 24-27   

7:24 Asa na umbege hatangki jala diulahon, sipatudoson ma i tu halak na marroha, na paulihon bagasna diatas batu mamak.

7:25 Ia ro pe udan potir, mangalantap pe tangkuju jala pur pe habahaba manondong bagas i, ndang na marumpak, ai batu mamak do haojahanna.

7:26 Alai na umbege hatangki, hape ndang diulahon, i ma sipatudoson tu halak na oto, na paulihon bagasna di atas rihit.

7:27 Dung i ro ma udan potir, mangalantap ma tangkuju, pur ma dohot habahaba manondong bagas i, gabe marumpak ma, pola tung marongso

Ep. : Psalm 40 : 9-12

40:9 Dipangido rohangku do patupahon lomo ni roham, ale Debatangku, jala di parsitongaan ni rohangku do patikmi.

40:10 Hubaritahon do hatigoran di * luhutan na bolon i; ida ma, ndang * hututup bibirhu, diboto Ho do i, ale Jahowa.

40:11 Ndang hutabunihon hatigoranmu di bagasan rohangku; sai hupaboaboa do hasintonganmu dohot hatuaonmi; * ndang huporso asi ni roham dohot habonaronmi tu luhutan na bolon.

40:12 Ho, ale Jahowa, sai unang polpol angka asi ni roham sian ahu: * Denggan basam dohot habonaronmi ma mangaramoti ahu tongtong

Patujolo :

Turpuk on ima bagian parpudi sian Jamita di Dolok (Mat. 5:1 – 7:29). Mansai jotjot do dibahen Tuhan Jesus parumpamaan di tingki marjamita asa mura diantusi natorop i. Molo tajaha di na opat evangelium i adong do lobi hurang 49 parumpamaan ni Tuhan Jesus disurathon disi. Turpuk Evangelium on ima parumpamaan ni Tuhan Jesus taringot tu dua halak na pajongjong bagas, na parjolo diatas ni batu mamak, napaduahon di atas rihit. (Pat. Luk 6:46-49).

Ndang pola maol antusan lapatan ni parumpamaan on, alana tangkas do dipaboa Jesus astuanna ima : “na umbege hatangki jala diulahon, sipatudoson ma i tu halak na marroha, na paulihon bagasna diatas batu mamak, Alai na umbege hatangki, hape ndang diulahon, i ma sipatudoson tu halak na oto, na paulihon bagasna di atas rihit”.

Alai, asa lam tangkas pangantusionta tapabagas ma jolo sada-sada.

Hatorangan

Adong dua bagian type ni jolma na manangihon hata ni Debata ima na mangulahonsa dohot na so mangulahonsa. Ra, sude do halak na targoar Kristen hea umbege manang manangihon hata ni Debata, ima marhite angka jamita di parmingguon, manang marhite media na asing isara ni TV/Radio, dohot marhite na manjaha Bibel manang buku na asing na marisi hata ni Debata. Tahaporseai do hata ni Debata i do hangoluan, songon na tarsurat di Mat. 4:4 "Apala holan sipanganon hangoluan ni jolma; tung nasa hata ni Debata do, na ro sian Ibana!",  jala taboto do ia hata ni Debata na tarsurat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran. (II Tim 3:16).

Alani, tung mansai ringkot do na manangihon hata ni Debata, ai marhite na na tumangihon hata ni Kristus do ro haporseaon (Rom 10:17). Tung mansai godang do  nuaeng on media na patubegehon manang manurathon hata ni Debata na boi dapot hita ganup ari, asing ni na tabege marhite angka ibadah minggu dohot di angka PHD/PA. Ndang songon na jolo i be, holan marhite parmingguon sambing do boi begeon hata ni Debata. Songon halak Kristen hita,  tontu sahali jotjot do hita manjaha dohot manangihon hata ni Debata, alai sadia godang ma naung tapeop hata i dibagasan rohanta jala taulahon dibagasan ngolu siganup ari?

Tarida doi sian parbuena, lam dao do jolma i sian pangalaho na hombar tu lomo ni roha ni Debata, gariada tahe lam torop halak na mangulahon angka na maralo tu hata ni Debata, boasa? Ima na dipatudos Tuhan Jesus tu halak na oto na paturehon/paulihon jabu/bagasna diatas ni rihit (pasir), ima angka halak na manangihon hata ni Debata alai ndang dihangoluhon (diulahon). Hape didok do di Jak. 2:17 “Haporseaon i pe songon i do: Anggo so adong pangulaonna, naung mate do hadirionna” (jaha Jak. 2:14-26). Antong sahali nai, boasa songon i?

Sipata, maol do tahilala mangulahon hombar tu hataNa i, jala jotjot do tadok ndang tarulahon hita i 100%. Memang, molo sian hagogoonta sandiri ndang tarulahon hita hata ni Debata, alai ingkon do marhite Tondi Parbadia na mangula dibagasan rohanta, gabe mangula ma nang Hata i dibagasan ngolunta. Songon na nidok ni Panurirang Jesaya di Jes. 55:11 “Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos”..

Alai nang pe songon i, ditompa Debata do hita gabe jolma na “merdeka”, na memiliki kehendak bebas laho manontuhon pilihan-pilihan dibagasan ngolunta. Alani do  diumpamahon Tuhan Jesus do jolma i songon sahalak panabur boni (Mat 13:1-23),  na memiliki kebebasan laho manontuhon sikap taringot hata ni Debata nauang binegena, boi do tabahen rohanta songon tano na di .topi dalan i, songon  tano na batuon, songon tano parsihupian manang songon tano na denggan.

Hombar tu turpuk jamita on, mangula do Tondi i dibagasan ngolunta, alai tong do di ujungna hadirionta sandiri do na manontuhon boha do hita “bersikap” laho mamillit ojahan ni ngolunta, di atas rihit do manang di atas batumamak?

Hadomuan na  tu turpuk Epistel

Hadomuan ni jamita molo dipahombar tu turpuk epistle Psalm. 40:9-12 on ima taringot tu na mangulahon lomo ni roha ni Debata. Halak na umbege hata ni Debata jala na mangulahonsa ima na :

1. Patupahon lomo ni roha Debata dibagasan ngolu siganup ari. (Psalm 40 : 9)
2. Mamaritahon hatigoran dohot hasintongan ni Debata tu saluhut halak (Psalm 40:10-11a)
3. Manghatindangkon denggan basa dohot asi ni roha ni Debata dibagasan ngolu siganup ari (Psalm 40:11b-12).

Panimpuli

Hata ni Debata do ojahan ni saluhut ngolunta, alai molo ndang tahangoluhon i dibagasan pangulaonta siganup ari, gabe ndang margogo be hita mangadopi saluhut angka hambatan, tantangan, ancaman dohot gangguan na masa di bagasan ngolunta, gabe mura ma hita madabu, marumpak jala marongso uju masa udan potir manang haba-haba di parngoluonta on. Alai sabalikna tahe, molo tahangoluhon hata ni Debata marhite pangulaonta siganup ari, aha pe na masa dibagasan ngolunta ndang be mabiar hita, ai gabe margogo ma hita mangadopi i, tung pe masa angka udan potir dohot haba-haba dibagasan parngoluonta, hot ma hita jongjong di ojahan na togu i ma batumamak na hot ro disalelenglelengna, Kristus Tuhanta i. AMEN !