Selamat datang di blog sederhana ini, kiranya menjadi berkat bagi kita semua

Selasa, 09 Februari 2010

TU DIA HO DUNG MATE HO?


Nunga mansai matua sada ina na mian di tano parserahan.
Lam tu galena do pamatangna, jala ndang apala dirohahon be na manganhon sipanganon. Marnida i disura roha ni angka ianakhonna ma na laho marujung nama ngolu ni inanasida i. Gabe dipados nasida ma roha dohot tahinasida laho mambahen sipanganonna. Dititi ma ari, jala diparade saluhut na hombar tusi.


Jumpang ma ari na tinontuhon, marroan ma sude angka na ginonghon tu ulaon i. Songon i ma antong dos ni rohanasida, parjolo ma dipatupa partangiangan dohot parpadanan na badia. Dipaihutihut inanta i do sude acara ni partangiangan dohot ulaon na badia i, isara tangiang, pujipujian, hamauliateon, panopotion di dosa, manang pe panindangion. Agia pe nanget, dohot do nasida mangendehon angka ende na dipatubegehon di parpunguan i. Torang do pangalusina di sungkunsungkun ni pandita i di na marulaon na badia i, tangkas do boi dijalo jala dipangan roti i, jala diinum dohot anggur i. Marnida i sandok tarhilas do roha ni saluhut na di parpunguan i, lumobi ma roha ni angka anakhonna. Pola do adong tahe na mandok: “Pasti do, tu surgo do Inang on.”

Bodarina i, dung simpul sude ulaon dohot panghataion na marpardomuan tu na pasahathon sipanganon dohot sulangsulang ni natuatuanasida i, disangahon angka ianakhonna i ma manghatahatai dohot inanta i. “Pasingotsingothon tahe asa sai ingot di sambulo ni tondina; manang sadihari pe marujung ngoluna unang gabe manimbil ibana sian i,” ninna nasida be. Gabe didok sahalak sian nasida ma: “Inong, dung na marulaon na badia i ho nangkin, nunga boha nuaeng roham, sonang do?” “Sonang do, Amang,” ninna inanta i nanget mangalusi. Didok anakna i muse: “Ai porsea do ho di Tuhan Jesus Kristus naung ro tu tano on, naung mate jala mangolu asa malua ho sian dosa, sian sibolis, dohot sian hamatean?” “Olo Amang, porsea do ahu,” ninna inanta i mansai nanget magalusi. “I ma da Inong, nunga mansai las rohanami mambege i. Molo tung marujung pe ngolum, tarapul ma rohanami marningot i,” ninna anakna i mangalusi. “Alai tahe Inong,” ninna anakna i muse, “nunga tangkas be nuaeng di ho, molo mate ho, tu dia do ho?” “Tu Toba do ahu Amang,” ninna inanta i mansai hatop jala hirtap.

Mansai tarsonggot do nasida sude umbege i, ai ndang dihirim nasida alus sisongon i, alus na mardomu tu haporseaon do. Alai ndang taralushon agia ise alus sisongon i molo sintap ni angka na di tano on do panatapan ni haporseaonna. Taringot tusi didok si Paulus do: “Anggo holan di tano on do hita manghirim di Kristus i, jolma na dumangol do hita sian saluhutna.” (1 Kor.15:19)

4 komentar:

  1. menarik, ada pencerahan.......

    BalasHapus
  2. thanks for inspiring me....

    BalasHapus
  3. ima da amang st UTM, mansai godang do halak hita batak dang manghirim rohana tu Surgoi, ai hira turiturian do di hilala nasida surgo i, molo halak Batak molo mate gabe begu meningkat gabe sahala naik pangkat muse gabe sahala promosi jabatan muse gabe SUMBAON. hea husukkun Op Bornok Nainggolan "Boha do Oppung,Porsea do ho na adong surgo?" Alus ni Op Bornok Nainggolan "dang binoto i amang, bah molo tipak hita manggadong,jala sehat pamatangta bah ido surgo i" Baritahon ma amang UTM asa lam godang halak hita Batak manghirim di Surgo i. mauliate ma.

    BalasHapus
  4. Horas amang "Anonim", mauliate di komentarmuna i, ima tutu, rap ma hita mamaritahon angka na denggan i, asa lam torop halak na manghirim di Tuhan i.

    BalasHapus

HTML