MALUA SIAN PANGKANGKUNGI

Minggu, 14 Februari 2009, nunga manghatindangkon haporseaon anak nami sekaligus 3 halak ima Niel, Kiki & Ridho di HKBP Tigaraksa Kota.
Di dalam masyarakat atau gereja Kristen–Protestan manghatindangkon haporseaon atau Malua sian Pangkangkungi adalah suatu ritus inisiasi yang disebut “sidi” (sempurna atau sah–bahasa Indonesia) atau “malua” (lepas–bahasa Batak), yaitu ketika seseorang berdiri di hadapan jemaat dan melafalkan pengakuannya terhadap doktrin gereja tentang Allah, Kristus Yesus, Roh Kudus, Gereja, Kebangkitan Daging atau Orang Mati dan Hidup Yang Kekal. Seseorang dapat dikatakan Lepas Sidi apabila ia telah menjalani Katekisasi selama lebih kurang 1 tahun. 

Songon na somal di keluarga ni "halak batak", molo malua ianakkon sai dipatupa do ulaon Sipalas Roha dung sidung acara gareja. Ima na hupatupa hami na di ari minggu i. 
Rap borhat ma hami dohot angka sisolhot mangudurhon anaknami tu gareja, antar somal do di HKBP, molo adong angka ulaon isara ni na tardidi dohot na malua sai tumorop do  halak na marminggu (ra ala adong angka keluarga/sisolhot na dohot mangudurhon angka ianakkon nasida), jadi gabe so hasiatan be gareja i pola sahat tu ruar halak jongjong mangihuthon parmingguon i.
Dung sidung jamita dipatupa ma agenda tu na malua, jongjong ma angka dakdanak na malua dohot natorasna, parjolo disungkun ma dakdanak i hombar tu agenda ni HKBP dungi rap dihatindangkon nasida ma hata haporseaon (Pengakuan Iman Rasuli). Dungi dijou Pandita ma nasida mardua-dua halak tu langgatan manjalo surat malua dohot angka ayat naung dipillit tu sasahalak, marsinggang ma nasida manjalo pasu-pasu sian pandita i. Tingki i adong 16 halak na malua (3 halak mai ianakkonnami) , jadi 8 hali ma pandita i mamasu-masu nasida.

Molo pinamanat, sai toho-toho do ayat hata sipaingot na di surat malua i tu karakter ni sasahalak, adong hata poda, adong hata pamujion, adong hata baga-baga, alai adong muse do pinsang-pinsang. Molo antar hona ayat i tu pangalohoa ni sasahalak, sai pintor masihusipan do begeon angka natorop i, hape songon na tarsurat di :

2 Tim 3:16 Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran. Alani dang tama uhuman halak marhite hata sipaingot na jinalona di surat malua, ai saluhutna do i hata ni Debata na denggan lao pauli-ulihon jolma i.

Dung sidung acara gareja, mulak ma hami tu jabu ai nungga torop angka sisolhot, ale-ale, boru, pariban, dongan sahuta, dongan tubu dohot hula-hula disi. Dipungka ma cara marsipanganon jala hupasahat hami ma tudu-tudu ni sipanganon tu anaknami naung malua i, hula-hula pe pasahathon dengke mas simudur-udur.
Dung sidung marsipanganon, dipatupa ma panghataion na dipungka marhite ibadah singkat sian dongan parhalado, dungi ro ma dongan sahuta mandok hata diuduti ma sian boru, dongan tubu, pariban dohot hula-hula Dung sidung i mangampu ma hami hasuhuton, parjolo ma angka dakdanak mandok mauliate tu sude angka na manghaholongi dungi Inanta pardijabu ma mangampu laos dipasingkop ma sian iba sandiri.
Ditutup ma cara i marhite ende dohot tangiang.
Roma angka tondong manjalang hami huhut pasahatton angka sipalas roha ni anak nami na malua i.
Antar songon i ma na hupatupa hami di tingki i.
Horas !!!!