DISON DO AHU TUHAN, SURU MA AHU
Ev. : Jesaya 6 : 1-13
6:1 Di taon hamamate ni raja Usia, huida Tuhan i hundul di atas habangsa na timbo, jala na marmulia, jala angka rambu ni pangkeanna manggohi bagas joro.
6:2 Jongjong di atasna surusuruan Serapim, angka na marhabong onom be, dua manghungkupi bohinasida, dua manghungkupi patnasida, dua mangkabangkon nasida.
6:3 Jala * marsijouan ma nasida songon on: Na badia, na badia, na badia do Jahowa Zebaot, * gok hamuliaonna liat portibi on.
6:4 Jadi humuntal ma angka ojahan ni tiang sian soara ni na manjou, jala * gok timus joro i.
6:5 Dung i hudok ma: Marjea ma ahu! Nunga mago ahu, ai jolma parbibir na ramun do ahu, jala di tongatonga ni bangso parbibir na ramun ahu maringan, ai nunga diida angka matangku Raja Jahowa Zebaot.
6:6 Dung i habang ma sada sian angka surusuruan Serapim mandapothon ahu, jala di tanganna sada batu arang na gara, na binuatna sian langgatan dohot gansip.
6:7 Jadi * dijama ma pamanganku, jala didok: Ida ma, on do na manjama bibir ni pamanganmu, paboa naung niunsat utangmu, jala naung * hinungkupan dosam.
6:8 Dung i hubege ma soara ni Tuhan i, na mandok: Ise do suruhononku, jala ise pardalannami? Jadi ningku ma: Dison do ahu, suru ma ahu!
6:9 Jadi didok ibana ma: Laho ma ho, jala dok ma tu bangso on: Sai mananginangi ma hamu, alai unang antusi hamu; sai ida hamu ma, alai unang mananda hamu!
6:10 Patangkang ma roha ni bangso on, jala mingori pinggolnasida, jala pitungi matanasida, asa unang marnida matanasida, manang marbinege pinggolnasida, manang mangantusi rohanasida, jala unang muba manang malum hilalaonna.
6:11 Jadi ningku ma: Sadia leleng on ale Tuhan? Jadi ninna ma: Paima tarulang angka huta, soada marisi, jala angka bagas so marisi jolma, jala tarulang tano i gabe halongonan.
6:12 Ai padaoon ni Jahowa ma angka jolma i, gabe langa situtu parsitongaan ni tano i.
6:13 Alai tading dope di bagasan saparsampulu, nang angka i siaphononna do, songon hau tusam, jala songon hariara na martungko di hatatabana; * boni nabadia do tungkona i.
Patujolo
Turpuk on ima pengalaman istimewa ni Panurirang Jesaya dibagasan parsaoranna dohot Debata. Tapamanat ma jolo aha do masa tu Panurirang Jesaya hatiha i.
Jesaya ima anak ni si Amos, na mangula di Juda dohot Jerusalem, uju di ngolu ni si Usia, si Jotam, si Ahas, si Hiskia, angka raja ni Juda. (Jes. 1:1). Boi dohonon termasuk kalangan istana do si Jesaya on, ai di ida ibana do boha ginjang ni roha ni raja Usia tingki manutung daupa di bagas joro i, laos gabe hona uhum raja i dibahen Debata marhite na marsahit puruon pardompahanna (kusta) (2 Kronika 26:16-21). Sian i dapot parsiajaran do si Jesaya, na so tupa marmeam-meam halak di bagas joro.
Turpuk on pangungkapon ni si Jesaya do on taringot huaso dohot keberadaan ni Debata na binereng na di bagas joro i. Pengalaman na mansai arga do i dibagasan ngoluna na berinteraksi ibana dohot Debata di bagas joro i. Laos i do gabe bohal ni si Jesaya tingki manurirangi bangso i.
Hatorangan
Pandohan “Di taon hamamate ni Raja Usia”, ima patuduhon partingkian ni na masa on, hira-hira taon 740 SM ma i. Nunga manurirangi hian Jesaya tingki so na masa i (Jes 1-5), alai tingki on dope ibana boi marnida Debata secara langsung.
Marhite pengalaman ni si Jesaya mamereng na masa i, gabe diparhatopot rohana do Bagas joro ima inganan na mansai badia, inganan ni Debata na marhuaso. Ido Alani di hatindangkon ibana do Tuhan i hundul di atas habangsa na timbo, jala na marmulia, jala angka rambu ni pangkeanna manggohi bagas joro. (Ay.1), jala jonjong do suru-suruan Serafim manjouhon “Na badia, na badia, na badia do Jahowa”. (Ay 2-3). Gabe humuntal ma bagas joro i jala gok timus. (Ay.4). Ima na patuduhon huaso ni Debata na maringanan disi.
Dibagasan biar dohot haserepon ni roha do si Jesaya marnida na masa i, alani do didok ibana “Marjea ma ahu..”, Di adopan habadiaon ni Debata dirajumi ibana do dirina na ramun, termasuk ma i dohot di panghataion. Jala maringanan ibana ditonga-tonga ni bangso na ramun. Alani tung mabiar situtu do ibana pola didok muse “Nunga Mago au..”. Haserepon ni roha dohot panandaon diri do na pinatuduhon ni si Jesaya disi.
Dibereng Debata do roha ni si Jesaya jala diboto Debata do hagaleonna di bagasan panghataion., alani disuru Debata ma suruanna Serafim (Serafim ima suru-suruan “tingkat tinggi”, secara harafiah marlapatan “makhluk yang menyala"). Dijama suru-suruan i ma pamangan ni si Jesaya jala didok “Ida ma, on do na manjama bibir ni pamanganmu, paboa naung niunsat utangmu, jala naung * hinungkupan dosam”.(Ay.7). Ima dalan ni Debata pabadiahon si Jesaya asa margogo ibana laho suruon ni Debata manurirangi bangso i.
Dung dijama Debata pamangan ni si Jesaya, ndang mabiar be ibana, tarida do i uju di disungkun Debata ibana “ Ise do suruhononku?, dialusi si Jesaya do tangkas “Dison do ahu, suru ma ahu!”.
Dungi di paboa Debata ma tu ibana angka hata sipasahotanna tu bangso i. ima taringot tu rimas dohot uhum ni Debata nanaeng sijaloon ni bangso i ala ni pambahenan nasida na so suman diadopan ni Debata. Ndang adong be biar di si Jesaya, tung pe angka hata na naeng pasahotnanna i, ima angka panurirangon taringot tu uhum na naeng ro tu bangso i, na tontu sahali pasti mendapat tantangan dan penolakan. Alai marhite huaso na jinalo na sian Debata margogo do si Jesaya manurirangi bangso i saleleng periode ni raja Jotam, Ahas dohot Hiskia.
Sipahusor-husoron
DISON DO AHU TUHAN, SURU MA AHU, on ma na gabe ondolan ni turpuk on di hita. Saluhutna do hita dijou Tuhan i gabe ula-ulana. Ndada holan na mangula di huria i na gabe pangula ni Debata, alai dohot do sude halak angka na mangula di ulaon hatopan pe tarjou do gabe siulahon lomo ni roha ni Debata.
Persoalanna, molo naung tarjou hita, boha do hita bersikap mangalusi jou-jouNa i? Olo do ra deba hita mandok : Ndang tama dope au Tuhan di adopanMu, ai pardosa do au, na ramun do au !, Jala debanari mandok “Na asing i ma jolo Tuhan, ndang jambarhu dope mangula di ladangMi, hurang malo dope ahu!. Mansai godang alus manang alasan na tabahen laho “mengelak” sian tanggung jawab panjouon ni Tuhan i.
Alai, pengalaman istimewa ni panurirang Jesaya di turpuk on mangajari hita, ndada hamaloonta, halobionta, manang tingkat pengetahuan na timbo mambahen hita tarjou, alai haunduhon, haserepon dohot biar mida Jahowa, i do na ni ida ni Debata asa dijou hita. Molo pe hurang malo hita, tuk do Debata mangalehon hapistaran, molo hurang tangkas hita manghatai, Debata do na manjama pamanganta asa tingkos manghatai, molo na hurang habisuhon hita, Debata do na pasahathon habisuhon i tu hita songon na nidok ni par Psalmen i “Biar mida Jahowa do parmulaan ni habisuhon, maruli hapistaran na sumurung do sude angka na mangulahonsa; hot do baritana i ro di salelenglelengna.” (Psalm. 111:10).
Antong molo naung tabege panjouon ni Tuhanta di bagasan ngolunta, taalusi ma “DISON DO AHU TUHAN, SURU MA AHU”. AMEN
Tidak ada komentar:
Posting Komentar
HTML